​​Эреэн гүрөөһэнэй зулзаган

Оройдоол табан һаратай зулзаган үнгэрһэн долоон хоногто Үбэр Бай­галай угсаатанай зүйн музейн ами­тадай тоо нэмээбэ. Тэрэ музейн ха­рагшадые баясуулхаар хараалагдана.

Ермак гэжэ нэрэтэй эреэн гүрөөһэнэй зулзаган Барнаулай зоопаркда түрэһэн намтартай. Ноябриин 6-да тэрэ эхэһээнь һалгаагдажа, холын замда гараа. Зоопаркын ажалшад хүхюу наадатай зулзага Кемерово, Красноярск болон Эрхүү хотонуудта зогсожо һамааруулаа, наадуулаа, эдеэлүүлээ. Тиигэ­жэ ноябриин 9-дэ Улаан-Үдэ хүрэжэ ерээ.

Музейн захирал Сергей Мещеряковой хэлэһээр, мүнөө үедэ хоёр бар амитадай таһагта тэжээгдэнэ.

- Манай музейдэ хоёр эреэн гүрөөһэн тоологдоно. Тэдэ үндэр наһатай болоо. Нэ­гэниинь аяар 17 наһа хүрөө. Байгаалида ябахадаа, тэдэ иимэ удаан амидардаггүй. Тиимэһээ залуу бар абаха гэһэн түсэб урдаа табяабди, - гэжэ захирал мэдүүлнэ.

Табан һаратай Ермак мүнөө 25 килограмм шэгнүүртэй юм. Музейдэ тэрээндэ ан хааха тусхай талмай (вольер) шэнээр баригдаа.

2018 ондо амитадай таһагта үшөө хоёр тэмээн худалдан абтаһан байна. Урид тэн­дэ ори ганса Сэсэг гэһэн энгин тэмээн бай­даг һэн. Сагай үнгэрхэ бүри бэе тамирынь һуларжа эхилээ, шэг шарайньшье муудаа. Харин шэнэ нүхэдэй ерэхэдэ, тэрэ һайнаар эдеэлдэг, хүхюутэй болоо.

Һүүлэй байдалаар тус музейдэ 117 шубуун болон амитан тоологдоно.

Музейн гэрэл зураг