1004
Буряадай ниислэлдэ үнгэргэгдэжэ байгаа Уласхоорондын "Эрхим багша" урилдаанай түрүүшын үдэрэй дүнгүүдээр Эрхүү можын Усть-Ордын тойрогой Буряад-Енгүүд нютагай һургуулиин буряад хэлэн болон уран зохёолой багша Инна Атутова 117 оноотойгоор эрхимлэнэ.
Удаань Буряад Уласай Үндэһэ яһатанай нэгэдэхи лицей-интернадай эхин ангиин багша Жаргалма Эрдынеева (115 оноо), Түнхэн аймагай Зүүн Мүрэнэй дунда һургуулиин буряад хэлэн болон уран зохёолой багша Зоригма Мантурова (114 оноо) гэгшэд ябана. Улаан-Үдэ хотын 32-дохи дунда һургуулиин багша Гэрэлма Ванзатова (111 оноо), Үбэр Байгалай хизаарай Агын Буряадай тойрогой Дулдаргын 2-дохи дунда һургуулиин багша Сэсэг Тумурова (110 оноо) дүрбэдэхи, табадахи һууринуудта гараа.
Үсэгэлдэр танилсуулгын мүрысөөнэй, мүн баһа онол арга, онсо шадабарияа элирхэйлэн харуулгын мастер-классай шатанууд үнгэргэгдэһэн байгаа.
Мүнөөдэр мүрысөөндэ хабаадагшад хотын хоёр буряад һургуулинуудаар таража, гол шатаяа гаталжа, хэшээлнүүдые үнгэргэнэд. Хоёрдохи үдэрэй дүнгүүдээр түрүүшын һуури эзэлэгшэд һэлгэлдэхэдээшье болохо гэжэ тэдэглэлтэй.
Уласхоорондын урилдаанда хабаадагшадые сэгнэхэ жюриин гэшүүд - Буряад Уласай, Монгол ороной, Үбэр Байгалай хизаарай Агын Буряадай тойрогой, Эрхүү можын Усть-Ордын Буряадай тойрогой түлөөлэгшэд. Тэдэ өөһэдөө дээдэ гарай мэргэжэлтэ багшанар, эрдэмтэд, буряад хэлэ сахин хүгжөөхэ хэрэгтэ хабаадалсадаг эдэбхитэд юм.
Буряад Уласай ниислэл - Улаан-Үдэ хотодо Уласхоорондын "Эрхим багша" гэһэн хоёрдохи урилдаан багшанарай уласай колледждо үсэгэлдэр эхилбэ гэжэ мэдээсээ һэмди. Энэ удаа Буряадай аймагуудһаа, Монгол Уласһаа, Эрхүү можоһоо, Үбэр Байгалай хизаарһаа дүн хамта 29 багша ерэжэ, тус мүрысөөндэ хабаадажа байна.
Автор: Василий ЦЫБИКОВ
