​​“Буряад соёлой” хэшээлнүүд

2014 онһоо олониитын “Бу­ряад соёл” ниитын эмхи түрэл арадайнгаа хэлэ, соёл хүгжөөхэ, арюун занша­лаа һэргээхэ зорилготойгоор ажалаа эхилһэн юм.

Энэ эмхиие мүнөө Солбон Санжиев хүтэлбэрилнэ. “Нёдондо жэл грант шүүгээбди. Тиигэжэ шэнэ ангинуудые нээ­хэ, багшанартаа бага сага салин түлэхэ арга­тай болоо һэмди”, - гэжэ Солбон Дугарович хөөрэнэ. Эмхидэ арбаад гаран багшанар хүдэлнэ. Тэдэниие түрүүлэгшын орлогшо Оксана Гармаева залан хүтэлбэрилнэ. Нэн түрүүн буряад хэлэндээ һургаха гэһэн зорилго табяашье һаа, баһал үндэһэн хатар, дуунуудтаа һургана. Буряадайнгаа мэдээжэ хүнүүдые урижа, уулзалгануудые үнгэргэнэ. Тиихэдээ ехэшүүлдэ анхаралаа хандуулна: эхэ хэлэндэнь эжыень түрүүн һургабал, тэрэ үхибүүгээ һургажа шадаха ха юм. Тиибэшье хүүгэдэй ангинууд хүдэлнэ, хүүгэд балшар багаһаан хэлэндэ бэрхээр һурана.

Буряад хэлэнэй һургуулинууд ехэнхи­дээ Улаан-Үдэдэ оршоно. Мүн ниислэл Москвада хэшээлнүүд үнгэргэгдэдэг.

Һаяар Хяагта, Гусиноозёрск хотонуудта һургуулинуудые нээхэ түсэбтэй. Тэдэ ан­гинуудта мүнөө үеын монгол хэлэ болон монгол бэшэг заагдаха юм.

Мүн баһа “Буряад соёл” буряад номуу­дые дэлгэрүүлхэ, үндэһэн зохёолоо дэм­жэхэ ажал ябуулдаг. Үльгэр онтохонууд, домог түүхэнүүд болон “Сагаан толгой” ород ба буряад хэлээр, монгол бэшэгээр хэблэгдээ. Мүнөө үнгэтэ зурагуудаар шэмэглэгдэһэн, ородоор, англяар, буряа­даар ба монгол бэшэгээр толи бэлдэгдэнэ.

“Буряад соёлой” дэргэдэ “Зугааша” бүлэг хүдэлнэ. Эндэ нэгэл эрилтэ табигда­на – ондоо хэлэнүүдэй үгэ холингүй, буряадаараа зугаалдаха.

Үнгэрхэ форумдо эдэбхитэйгээр хабаадажа, өөһэдынгөө һанал бодолнуудаар ху­баалдахабди.

Анна Огороднигой гэрэл зураг