​​Агаяа алдаршуулһан Бэлигма

Энэ намар Ородой Холбоото Ула­сай дэбисхэртэ үнгэргэгдэһэн хатарай “Джаз дэнс” гэһэн нааданда Ага нютагай Бэлигма Цырендоржиева шалгаржа, Россиин чемпион болоо гэһэн мэдээсэл гүрэн дотор тараа бэлэй.

Манай буряад басаган хоёр сагай ху­гасаада 8 бэрхэ хатаршадтай мүрысэжэ, шата бүхэниие эрхимээр дабажа шадаа. Гурбан шата бүхэндэ гурба дахин хатар­жа, түгэсхэлэй шатада нэгэ хүбүүнтэй гараад, үшөө гурбан хатар нэгэшье амарангүйгөөр хатарһан басаган эсэһэн сусаһан түхэл огтолон харуулаагүй. Хэрбэеэ нүгөөдэ хүбүүхэн һүүлшын хатарта эсээд, хүдэлсэеэ һуладуулжа эхилхэдэнь, Бэлигма бүри нугархайгаар хүдэлжэ, энеэбхилэн хатаржал байгаа һэн. Иимэ шанга зантай, зориһондоо тэгүүлдэг басаган шүүгшэдэйшье, ха­рагшадайшье зүрхэ буляагаа бшуу.

Багшань харгы заажа үгөө

Бэлигма Цырендоржиева Агын 1-дэхи дунда һургуулида һурадаг юм. Нэгэдэхи ангиһаа 11–дэхи хүрэтэрөө ганса “5” сэгнэлтээр һурадаг байна. Мүнөө һуралсалай шэнэ жэлэй сен­тябриин 1-эй үдэрэй баяр ёһололой һайндэртэ һургуулиин туг өөдэнь үргэхэ эрхэдэ хүртэһэн. Тиихэдэ Росси­ин абарга үшөө болоодүй байгаа.

Бэлигма тоо бодолгодоошье, ород, буряад, хари хэлэндээ, тамир болон бусад хэшээлнүүдтээ ходол эрхим сэг­нэлтэ абадаг, хатарха, дуулаха болон хубсаһашье оёжорхихо шадалтай юм.

Нэгэдэхи класста һуража байхадань, Вера Владимировна Абадаева багшань бултыень дахуулжа, Агын хүүгэдэй ис­кусствын һургуулиин хатарай “Баяр” ансамбльда тушааһан юм. Гурбан жэл нэтэрүүгээр бултыень абаашажал бай­гаа. Саашаа нэгэ хэды басагад үлэжэ, найман жэл һураһан юм. Бэлигма ха­тарай һургуулияа улаан дипломтой дүүргэһэн юм. Агын 1-дэхи һургуулиин дэргэдэхи “Булжамуур” ансамблиин со­листаар хатараа. 5-дахи класста һуража байхадаа, “Хун шубуун” гэжэ хатарта гол дүрэ гүйсэдхэдэг һэн. Энэ хатар бүхы наадануудта, һайндэрнүүдтэ ходол та­бигдадаг бэлэй. Энээнһээ уламжалан, ансамблиингаа гол хатаршан болоо.

Санкт-Петербургда Гран-при абаа

2017 ондо Агын 1-дэхи дунда һургуулида хүгжэмшэн Мүнхэ Цыденов “Үльгэрэй орон” гэжэ театр байгуулһан. Эндэ хатар, дуу, арадай аман зохёол, буряадай хүгжэмэй оркестр гээд нэ­гэдэжэ, тоглолтонуудые табидаг һэн. Светлана Юндунова багшань “Алхана”, “Бальжан хатан” гэжэ шэнэ хатарнуу­дые найруулһан байна. Эдэ найруул­гануудаа Санкт-Петербургда үнгэрдэг “Невские перспективы” гэһэн фести­вальда абаашажа харуулаа. Тэндэ бүхы шэглэлээр түрүү һууринуудые эзэлэ­эд, “Бальжан хатан” хатараар Гран-при абаа бэлэй.

- Һонин гэхэдэ, бүхы шэглэлээр ха­тарыемнай үндэр сэгнэлтээр магтаад, ганса гуталнуудтнай хуушараа гэжэ жюриин гэшүүд хэлээ бэлэй. Яагаад хатарай үедэ хуушан гутал гэжэ эли бай­гаа гээшэб гэжэ гайхалдаа бэлэйбди, - гэжэ Бэлигма энеэнэ.

Һүүлшын һууриһаа абарга хүрэтэр

“Юбисофт” гэһэн компани һургуулинуудаар “кибер тамирай стимулятор” гэһэн хэрэгсэлнүүдые тараа­жа, “Джаз дэнс” гэһэн гүрэнэй хэмжээ­нэй харалганда хабаадахые дурадхаһан байгаа. Светлана Юндунова багшань эгээл эрхим хатардаг 4 басагадые шэлэ­эд, бэлдэжэ эхилһэн. Ага тосхоной бүхы һургуулинуудһаа хатаршад булта Урда-Ага һууринда сугларжа, түрүүшын шата үнгэргэһэн. Москва хотоһоо зорюута шүүгшэд ерэжэ, эрхим хатаршадые шэ­лээ. Тэндэ эгээл эрхим гээд, Агын 1-дэхи һургуулиин 4 басагадай бүлэг тодороо. Хубиин тоогоор Бэлигма түрүүлһэн юм.

- Москва ниидэхэдээ, нэгэ басагам­най үбдэшөө, тиихэдэнь бидэ гурбуулаа юрэ дүршэлтэй болохо гэжэ хабаадаха гэжэ шиидээбди. Түрүүшын шата нүхэд басагадни дабажа шадаагүй. Харин би бүхы хабаадагшадай эгээл һүүлшын байгаа һэм, - гэжэ Бэлигма хөөрэнэ.

Эгээл һүүлшын тоодо байһан хүн бултыень илажархиха гэжэ хэн мэдэхэб даа. Тиигэжэ Бэлигма Россиин абарга болошоо. 2019 ондо Бразилида үнгэрхэ Дэлхэйн хэмжээнэй мүрысөөндэ хабаа­даха аргада хүртөө.

Алишье талаар тэгшэ бэрхэ

Бэлигма бага байхадаа, балерина болохоб гэдэг һэн. Харин һургуулида һуража эхилхэдээ, англи хэлэндэ тон абьяастайгаар һураа. Тоо бодолго, информатика, түүхэ, физикэ болон бусад хэшээлнүүдтээ баһал бэрхэ һурадаг. Һургуулияа алтан медальтай дүүргэхэ гэжэ бэлдэжэ байна. Манай хэн болохобши гэхэдэ, бодомжолоод:

«Сэхыень хэлэхэдэ, хатарайшье баг­ша гү, али артист болохо гэһэн һанал багаһаамни намда ерэдэг һэн. Теэд мүнөө байдалай эрхээр ондоохон мэр­гэжэл шэлэхэ хэрэгтэй гэжэ һанагшаб. Минии хүгшэн аба Ородой Холбоото Уласай габьяата багша Цыбик Базаро­вич Цырендоржиев намда ёһотой жэ­шээ боложо, зүб харгы руу шэглүүлжэ байдаг», - гэжэ Бэлигма хэлэбэ.

Бэлигмаагай уг гарбал тухай хэлэбэл, Буряадай мэдээжэ артист Цыден Цырен­доржиевай ахын аша басаган гээшэ. На­гаса эжынь Бальжима Мункожаргаловна Чимитова Агадаа мэдээжэ багша, “Ал­таргана” нааданда олон дахин илагша, арадай аман зохёолой “Ажалчин” гэһэн ансамблиин хүтэлбэрилэгшэ юм.

Түрэһэн абань Бато Цыбикович Үбэр Байгалай хизаарай эгээл эрхим фермер, хүдөө ажахын үмсын хэрэг эр­хилэгшэ, эжынь Наранма Викторовна - һургуулиин захиралай орлогшо. Али­шье тээһээ ажалша бэрхэ угтай хүн хэһэн ажалдаа оролдосотой байдаг.

- Англи хэлэ үшөө гүнзэгыгөөр шудалхаб, мүн журналистын ажал һайшаадагби. Тоо бодолгодо ядадаггүйшье һаа, гуманитарна шэглэл намда тааруу - гэжэ Бэлигма мэдүүлбэ.

Хэншье болоо һаа, энэ наһандаа эр­дэм шудалха, амжалта туйлаха гэһэн эрмэлзэл урдаа табиһан залуу хүн хэ­зээдэшье урагшатай ябахал ёһотой. Ажабайдалай үргэн харгыда гарахаяа байһан Бэлигма басаган мүнөө фев­раль һарада Ородой Холбоото Уласаа түлөөлжэ, ехын газар ошохоёо байха­дань, амжалта хүсэел даа.

Гэрэл зураг Бэлигма Цырендоржиевагай хубиин жасаһаа абтаба