​​Шэлжэн ороһон шэнэлэлтэнүүд

Сергей Кириенко Владимир Соловьёвто Юрэнхылэгшын баярай бэшэг дамжуулна

Наталья  Губернаторовагай гэрэл зураг

Москвада ноябриин 13-14-эй үдэрнүүдтэ үнгэрһэн Россиин Сэтгүүлшэдэй холбооной 100 жэлэй ойн баярай хэмжээнүүдтэ бүхы 85 можо нютагһаа түлөөлэгшэд байгаа. Нютаг нугаараа илгаатайшье һаа, нэгэ гүрэн түрэдэ ажаһуудаг тула, дүтэрхы хараа бодолтой, дутуу дундануудтайбди гэһэн тобшолол эгээл энэ уулзалгын үедэ хэгдэбэ.

Ажал нэгэтэнэй адли заншал

Буряад Уласай Түлөөлгын эмхитэй зэргэлээд оршодог «АИФ» сониной Хэблэлэй байшанда тон һонирхолтой харалган болоо. Магад, сонин хэблүүлхэ хэрэгтэ хабаатай намда ехэтэ һайшаагдаа аалам. Гэбэшье Россиин ниислэлдэ түбхинэһэн аад, аяар 68 можо нютагта өөрын хабсаргалтатай хэблэл мүнөө сагта яагаад ажалаа ябуулнаб гэжэ танилсаха арга боломжо - тон хоморой. Илангаяа үндэһэн хэблэлдэ хүдэлдэг нам мэтын сурбалжалагшадай Москва ниидэхэмнайшье тоотой ааб даа. Тиимэһээ «АИФ» сониной ажалшадай байрлаһан Иван Барышкинай особняк доторхиие харалган нюдэ сабшаха зуура үнгэрбэшье, дууһыень хаймадан абахал гэжэ оролдолго гаргааб.

Мэргэжэл нэгэтэн бэе бэеэ шууд ойлгоно гэжэ дахинаа адаглааб. Үүдэнэй дэргэдэ энеэбхилэн угтаһан Юлия Шигареваһаа сурбалжалагшадай түрүүшын асуудал иимэ: «Хэды хэһэгээр долоон хоногто нэгэ удаа хэблэгдэнэбта?». Хорёод жэлдэ соёлой таһагые ядамаггүй хүтэлжэ байһан хүндэмүүшэ сэтгүүлшэнэй дуулгаһаар, мүнөө дээрээ 1,5 сая хүрэнэ. Харин 1990-ээд онуудай эхеэр 33 сая хэһэгээр таража, Гиннесэй номдо оруулагдаһан Россиин ори ганса сонин болоо бэлэй. Арайл энэ тоо саашадаа дабтагдаагүй. Удаадахи 10-аад жэлдэ улам үсөөрхөөр хараалагдана. Саарһанай үнэ сэн 15 процентээр һаядаа нэмэгдэжэ, сонин болон сэтгүүлнүүдэй тоо бүри доошолуулха хэбэртэй. Теэдшье электрон хэрэгсэлнүүд дэлгэрһээр бшуу.

Сониной үнэн нүхэр, һүлдэ тэмдэг болоһон нохойн хоншоор һабардаад, дэргэдэнь гэрэл зурагаа абхуулаад, хуралдаануудые үнгэргэдэг томо таһалга руу уригдабабди. Хэрбэеэ XVIII зуун жэлдэ эндэ баалнууд үнгэрдэг һаа, мүнөө сониной ехэ-ехэ айлшад, тэрэ тоодо Наина Ельцина, Алла Пугачёва, гүрэнэй юрэнхылэгшэнэр сэтгүүлшэдтэй хуралдаа зарладаг юм ха. Эдэ зоной гэрэл зурагууд хана шэмэглэнэ.

Удангүй хэблэлэй ажал ябуулдаг таһалгануудта харалгамнай үргэлжэлбэ. Вёрстко хэдэг газарта сониной шэнэ дугаарай хуудаһанууд хана дээрэ хадаатай. Һураһанаа һураар татахагүйш гэдэгтэл саарһан дээрэ буулгажа шалгадаг заншалаа «АИФ» алдаагүй.

Олоной һонирхол татахын тулада гэрэл зурагуудые болон коллаж сониндоо олоор оруулдаг болоо. Дугаар бүхэниие Андрей Дорофеевэй коллажнууд шэмэглэнэ. Шааржнуудые зурадаг зураашадшье һууна. Сэтгүүлшэд һууридаа юу һуухаб даа – һонин мэдээ бэдэрһээр, «бэлшэһээр».

Дунда зэргын салингай хэмжээн 45 мянга хүрэнэ гээд Юлия Шигареваһаа мүрдэжэ мэдэбэб. Тиихэдэ сэтгүүлшэн һарын туршада 60 мянган тэмдэг бэшэхэ хэмжүүртэй. Хүнэй арга боломжо соо хүргэхөө оролдообди гэнэ һэн.

Ханада хадаатай шэнэ дугаар Юлия Шигарева харуулна

Сарюуна Эрдынеевагай гэрэл зураг

«Хэмэл ухаанай» хэмжэшэгүй боломжо

Иигэһээр саарһан хэблэлнүүд саана үлэжэ, Интернет бүгэдые булиха, урда гараха гэһэн һанамжа үнинэй хэлэгдэнэ. Энэ ехэ тэмсээн тухай хөөрэлдөөн замхадаггүй. Нютаг можонуудай сэтгүүлшэд баһал энэ асуудал дайраба.

Мүнөө дээрээ сониноо дэлгэрүүлхын, олондо мэдүүлхын тулада сайт хэрэглэнэбди. Харин саарһан дээрэхимнайл манаа тэжээнэ гээд, «АИФ»-ай ажалшад тэмдэглэнэ. Саашадаа саарһаар хэдэн сая хэһэгээр хэблэгдэхэеэ болибошье, мянгаад хэһэгээр таражал байха аабза гэһэн найдалынь бүхөөгүйл байна.

Сонинойнгоо 20 хуби материал сайтдаа оруулнабди гэжэ веб-редактор Владимир Шушкин дуулгаба. Сайтда дэлгээгдэһэн шүүмжэлгэтэй зураглалнууд, хүнүүдэй һанамжанууд олоной дура буляана. Юундэб гэхэдэ, «АИФ» болбол шэнэ мэдээ бусадһаа түрүүн дамжуулхаяа урилданагүй. Үнгэрһэн үйлэ хэрэгүүдые хэдэн тээһээнь хаража, сэгнэлтэ үгэнэ, үргэлжэлэлыень дуулгана. Дэлхэйдэ нэбтэрүүлэгдэһэн «хэмэл ухаан» тиигэжэ шадахагүй. Сэдьхэлэй хүбшэргэйе хүдэлгэһэн уянгата зураглал, очерк гэхэ мэтые бэшэжэ барахагүй. Теэдшье ерээдүйдэ роб-сэтгүүлшэд тобшохон мэдээнүүдые түргэн болзорто «түрэжэл» байха. Жэшээлхэдэ, 2016 ондо Heliograf гэжэ ботые The Washington Post нэбтэрүүлээд, Рио-де-Жанейрын Олимпиин наадануудһаа мэдээсэлнүүдые шууд ябуулхыень хэрэглээ бшуу.

Алтан дэлхэй – альган дээрэ

Мүнөө хэмнайшье газетэ, компьютер шэрээд ябанагүй. Алтан дэлхэйн алибаа үйлэ хэрэгүүдые альган дээрэхи утаhаараа мэдэнэбди. Сагай ошохо тума бүгэдэ зон тиигэдэг болохо гэһэн һанамжаяа Rambler компаниин захиралай орлогшо Виктор Саксон олондо дуулгахаяа оролдоо. Ябууд дундаа гар утаһаяа гаргаад, электрон хуудаһануудые иражархихада - бэлэншье, түргэншье. Эгээл тиимэhээ һүүлэй үедэ хүндэлэн гэрэл зурагууд болон видео-буулгабаринууд хүндэгүй болонхой.

Үргэлжэ хубилжа байгаа дэлхэйдэ олонхи хэблэлнүүд дадахал гэжэ оролдоно. Эгээл тиимэһээ социальна холбоонуудта хэблэлээ дэлгэрүүлгын тусхай таһагшье нээгээд туршадаг юм байна.

Урид сэтгүүлшэн бүгэдые шадаха универсал байха ёһотой гэһэн эрилтэ табигдадаг һаа, нэгэ шэглэлээр гүнзэгы мэдэсэтэй мэргэжэлтэдһээ бүридэһэн хэблэл һүүлэй үедэ үндэрөөр сэгнэгдэжэ эхилээд байна. Үндэр тушаалтай зоной үүдэ “үдьхэлэн” һагад орожо шададаг аад, компьютер мэдэхэгүй сэтгүүлшэд байна ха юм. Шэнэ оньһон түхеэрэлгэнүүдтэ тордиһогүй зон эдэ зониие һэлгэжэ яашье шадахагүй байна гэжэ саг харуулба.

Аюул ехэтэй алба хэнэбди

Улас түрын бүхы үйлэ хэрэгүүдтэ оролсодог сэтгүүлшэд албанай хэрэгээр аюулта газарнуудта эльгээгдэнэ. Дэлхэйдэ үдэр бүри 2 сэтгүүлшэн наһа барана. Тиимэһээ аюултай мэргэжэлнүүдэй нэгэн гэжэ тоологдодог болоо. Энээн тухай Ородой Холбоото Уласай Юрэнхылэгшын Захиргаанай хүтэлбэрилэгшын нэгэдэхи орлогшо Сергей Кириенко тэмдэглэбэ.

Үнгэрһэн жэлдэ Россиин Сэтгүүлшэдэй холбооной түрүүлэгшээр һунгагдаһан Владимир Соловьёв дайнай дүлэн сооһоо мэдээсэлнүүдые 1-дэхи каналаар дамжуулдаг байгаа. Чечен дайниие дууһан ябажа гараһан. Тиимэһээ сэтгүүлшэдэй эрхэнүүдые хамгаалгада гол анхаралаа хандуулна. Энэ талаар хэлсээ байгша оной эхиндэ Ородой Холбоото Уласай дотоодын хэрэгүүдэй сайд Владимир Колокольцевтой байгуулаа.

Ойн баярай онсо таланууд

Ойн баярай гол хэмжээндэ Россиин Юрэнхылэгшэ оролсохо гэжэ хүлеэгдэһэн байгаа. Тиигэжэ залуу сэтгүүлшэдые хабаадуулха тухай даабари нютаг можонуудай холбоонуудта үгтөө. Тиин гэһээнь Владимир Путин Сингапур ябашоо.

Харин Москвагай мэр Сергей Собянин Сэтгүүлшэдэй суглардаг түб байшаниие һэльбэн шэнэлэлгэдэ 300 сая түхэриг һомолоо. Энэ үнэтэ бэлэгыень сэтгүүлшэд үндэрөөр сэгнэжэ, нэрьемэ альга ташалгаар угтаһан байна.

Гүрэн түрын түүхэ түүрээдэг сэтгүүлшэдэй хоорондоо холбоотой байхынь тулада зуун жэлэй саана байгуулагдаһан олониитын эмхиин ажал үргэлжэлһөөр.