1010
«Эрхим багша» гэһэн урилдаанай хоёр үдэрэй дүнгүүдээр үсэгэлдэр түрүүлжэ ябаһан хоёр багшын – Буряадай Уласай Үндэһэ яһатанай лицей-интернадай эхин ангиин багша Жаргалма Эрдынеева, Эрхүү можын Усть-Ордын Буряад тойрогой Оһын аймагай Буряад-Енгүүд нютагай дунда һургуулиин түрэлхи хэлэн ба уран зохёолой багша Инна Атутова гэгшэдэй түлөө үгтэһэн дуунуудай тоо тэнсэжэ, тус тустаа 220 оноотойгоор мүрысөөнэй гол шухала шатануудые тэдэ дабажа гараһан байха юм.
Урилдаанай дүримөөр хоёр үдэрэй туршада гурбан шатын үнгэрхэдэ, дүнгүүд согсологдожо, хабаадажа байһан 29 багшанарай арбаниинь лэ дүрбэдэхи шата дабажа гараһан байха юм. Дээрэ нэрлэгдэһэн хоёр багшаһаа гадуур Улаан-Үдын 32-дохи дунда һургуулиин буряад хэлэнэй багша Гэрэлма Ванзатова (215 оноо), Монгол Уласай Улаан-Баатар хотын Үй-Цай һургуулиин монгол хэлэн ба уран зохёолой багша Болдын Сарантуяа (208 оноо), Улаан-Үдын 29-дэхи буряад гимназиин буряад хэлэнэй багша Арюна Цыжипхенова (207 оноо), Монгол Уласай Булган аймагай Хишиг-Өндөр сомоной һургуулиин багша Үүрийнцолмон Бямбасүрэн (206 оноо), Буряад Уласай Ярууна аймагай Иисэнгын дунда һургуулиин буряад хэлэн, уран зохёолой багша Анжела Шойндонова (205 оноо), Үбэр Байгалай Хизаарай Агын Буряадай тойрогой Дулдаргын хоёрдохи дунда һургуулиин багша Сэсэг Тумурова (202 оноо), Монгол Уласай Булган аймагай Булган хотын 1-дэхи дунда һургуулиин монгол хэлэн болон уран зохёолой багша Энхчимэг Ширчин (200 оноо), Буряад Уласай Загарай аймагай Загарайн дунда һургуулиин буряад хэлэнэй багша Оюна Додиева (196 оноо) гэгшэд эрхимлэһэн арбанай тоодо ороһон байна.
Харин мүнөөдэр энэ багшанар ангиин саг үнгэргэжэ, үшөө нэгэ дабаа дабажа гараһан байна. Тэдээн сооһоо эрхимлэһэн табан хүниинь табадахи шатада хабаадаха эрхэдэ хүртэжэ, Буряад Уласай Болбосоролой болон эрдэм ухаанай сайд Баяр Жалсановтай уулзажа хөөрэлдөө. Эдэ хэд бэ гэбэл, иимэ: Гэрэлма Ванзатова, Жаргалма Эрдынеева, Инна Атутова, Сэсэг Тумурова Үүрийнцолмон Бямбасүрэн. Хөөрэлдөөнэй үедэ сайдай табиһан хэдэн асуудалнуудта эрхимлэһэн багшанар харюусаа, хараа бодолнуудаараа андалдаа, эрхилжэ байһан ажалаа элирхэйлэн хэлээ.
Энэ уулзалга Уласхоорондын урилдаанай һүүлшын шата байгаа бшуу. Һаяын сагта түгэсхэлэй баярай хэмжээ ябуулга дээрэ эсэсэй дүнгүүд соносхогдохо.
Улаан-Үдэ хотодо Уласхоорондын “Эрхим багша” гэһэн хоёрдохи урилдаан багшанарай уласай колледждо уржадэр эхилээ гээд мэдээсээ һэмди. Энэ удаа Буряадай аймагуудһаа, Монгол Уласһаа, Эрхүү можоһоо, Үбэр Байгалай хизаарһаа дүн хамта 29 багша ерэжэ, тус мүрысөөндэ хабаадаа.
Влад Ангарскийн гэрэл зураг
Автор: Василий ЦЫБИКОВ
