1031
«Гэрэй аюулгүй байдал» гэһэн габшагай һарын хэмжээндэ Буряад уласай аймагуудай хүүгэдэй сэсэрлигүүдтэ түймэрһөө һэргылхэ талаар мүрысөөн, наадануудые үхибүүдэй дунда түймэрһөө һэргылэмжын албанай мэргэжэлтэд эмхидхэнэ.
Түймэрһөө һэргылхэ дүримүүдтэй Хори аймагай мэргэжэлтэн Оюна Сушкеева, Захаамин аймагай мэргэжэлтэн Наталья Бодрова гэгшэд хүүгэдэй сэсэрлигүүдтэ һонирхолтой хэмжээ ябуулгануудые үнгэргэбэ. Тиихэдэ хүүгэд түймэр сарагшадай албанда хүрэжэ, түймэр унтараадаг хэрэгсэлнүүдтэй танилсана. Үхибүүд түймэр сарадаг машинада һуужа, соробхилжо байһан гал дүлэ унтараагаад туршаха аргатай.
Тиихэдэ түймэр һэргылэмжын албанай мэргэжэлтэд хүүгэдэй сэсэрлигүүдэй болон һургуулинуудай багшанар болон хүдэлмэрилэгшэдтэ гэнтын аюулай ушараа һаа, яажа үхибүүдые абархаб, түймэр сарадаг хэрэгсэлнүүдые яажа зүбөөр хэрэглэхэб гэжэ заажа, харуулжа үгэбэ.
- Гэнтэ түймэрэй гараа һаа, багшанар мэгдэнгүй, үхибүүдээ аюулһаа гаргажа шадаха байха гэһэн зорилготой иимэ хэмжээ ябуулганууд үнгэргэгдэнэ. Гэнтын аюулай болоходо, юумэ мэдэхэгүй хүнүүд мэгдэжэ, туһа хүргэхын орондо, һаад ушаруулха ушарнууд үзэгдэдэг. Тиимэһээ хүүгэдтэй хүдэлдэг хүнүүд түймэр һэргылхэ талаар дүримүүдые мэдэжэ, иимэ ушарта ямар хэмжээ абахаб гэжэ үхибүүдтэ зааха шухала, - гэжэ эрхэтэдые баталан хамгаалалгын болон гэнтын аюулай уласай агентствын ахамад мэргэжэлтэн Юлия Рапп тэмдэглэнэ.
