1139
Уласхоорондын “Эрхим багша” гэһэн хоёрдохи урилдаанда Улаан-Үдэ хотын 32-дохи дунда һургуулиин буряад хэлэнэй багша Гэрэлма Ванзатова эрхимлэжэ, “Эрхим багша” гэһэн нэрэ зэргэдэ, гол шанда хүртэбэ гээд дуулгаа һэмди.
Түрүү табан багша
Нэгэдэхи һуурида Буряад Уласай Үндэһэ яһатанай 1-дэхи лицей-интернадай эхин ангиин багша Жаргалма Эрдынеева эзэлһэн байха юм. Үбэр Байгалай хизаарай Агын Буряад тойрогой Дулдаргын хоёрдохи дунда һургуулиин багша Сэсэг Тумурова хоёрдохи һуурида гараа.
Урилдаанай һүүлшын, табадахи шатада, Болбосоролой болон эрдэм ухаанай сайдтай болохо хөөрэлдөөндэ дүрбэн лэ хүн оролсохо ёһотой байгаа. Теэд хабаадагшадай түлөө шүүгшэдэй үгэһэн дуунууд тэнсэжэ, табан хүн сайдтай хөөрэлдөө. Тиигэжэ мүрысөөнэй дүнгүүдээр гурбадахи һуурида хоёр хүн нэгэмүһэн дэбжүүлэгдээ. Жюриин 13 гэшүүнэй нюусаар дуугаа үгэһэнэй дүнгүүдээр Эрхүү можын Усть-Ордын Буряад тойрогой Оһын аймагай Буряад-Енгүүд нютагай дунда һургуулиин түрэлхи хэлэн ба уран зохёолой багша Инна Атутова Монгол Уласай Булган аймагай Хишиг-Өндөр сомоной һургуулиин багша Үүрийнцолмон Бямбасүрэн хоёр хүрэл шангай һуури эзэлээ бшуу.
Баярай оршон бахархамаар байгаа
Үреэлэй һайхан үгэнүүдые хэлэжэ, үнэтэ бэлэгүүдые барюулха заншалта хэмжээ ябуулга Буряадай уласай багшанарай колледжын баярай танхим соо үсэгэлдэр үдэшэ нэерээ.
Буряад Уласай Засагай газарай Түрүүлэгшын орлогшо – Буряад Уласай Толгойлогшын болон Буряад Уласай Засагай газарай Захиргаанай Хүтэлбэрилэгшэ Баяр Цыренов түгэсхэлэй ёһололдо хабаадалсажа, үгэ хэлэхэдээ, Уласхоорондын хоёрдохи “Эрхим багша” урилдаанай манай Буряад Уласта амжалтатайгаар үнгэржэ байһан ушараар Буряад Уласай Толгойлогшо, Засагай газарай Түрүүлэгшэ Алексей Цыденовэй зүгһөө, өөрынгөө талаһаа хоёр хэлэн дээрэ амаршалаа. Илангаяа хилын саанаһаа – Монгол сайхан оронһоо, мүн баһа хүршэ нютаг можонуудһаа – Үбэр Байгалай хизаарһаа, Эрхүү можоһоо ерэһэн багшанарта баяр хүргөө. “Гансашье холын харгы зам гаталжа ерээ бэшэ, гүрэнүүдэйнгөө, нютаг можо, тойрогуудайнгаа хоорондохи холбоо бэхижүүлбэт, бүри дүтэ, дулаахан харилсаа батадха гээшэт”, – гэжэ Баяр Дашиевич онсолһон байха юм. “Үндэһэн хэлэеэ үндэр дээрэ үргэжэ, сахин хүгжөөжэ, үеһөө үедэ дамжуулжа байһан танай буян хэзээдэшье буурахагүй”, - гээд тэрэ тэмдэглээ.
Буряад Уласай Арадай Уласай Арадай Хуралай Түрүүлэгшын орлогшо Баяр Жамбалов мүн лэ урилдаанда хабаадагшадые хани халуунаар амаршалаа, бэлэг сэлэг баряа.
Монгол Уласай Юрэнхылэгшын Болбосоролой асуудалануудай талаар зүблэгшэ Чулуунбаатарын Чулуунцэцэг амаршалгын үгэнүүдые хэлэхэдээ, уласхоорондын энэ урилдаан үндэр хэмжээндэ үнгэржэ байна гэбэ. Хоёр ороной хоорондохи харилсаа холбоондо ехэ нүлөө үзүүлдэг эн мүрысөөндэ 2016 ондо Буряад Уластай хилэтэй Булган, Сэлэнгэ аймагуудһаа багшанар ерэһэн һаа, мүнөө мянга хахад гаран модоной зам гаталжа, аяар Дорнод аймагай түлөөлэгшэд ерээ гэжэ Юрэнхылэгшын зүблэгшэ онсолоо.
Удха ехэтэй урилдаанай дүнгүүд улад зониие уяруулаа
Болбосоролой болон эрдэм ухаанай сайд Баяр Жалсанов мүрысөөндэ ерэһэн бүхы багшанарые, олон тоото айлшадые, хабаадагшадые дэмжэжэ байһан зониие амаршалхадаа, уласхоорондын хэмжээндэ хоёрдохи удаа үнгэргэгдэһэн урилдаанай удха шанар тухай хэлээ. Угсаата арадайнгаа уян нугархай хэлэ улам бүри хүгжөөхэ, саашанхи үенүүдтэ сахин дамжуулха түүхэтэ ехэ үүргэ багшанар дүүргэнэ гэжэ хэлээ. Удаань уридлажа гараһан багшанарта бэлэгүүдые барюулаа, хани халуунаар амаршалаа.
Ородой Холбоото Уласай Гүрэнэй Дүүмын һунгамал Алдар Дамдинов мүн лэ амаршалгаяа эльгээһэн байха юм.
Аймагуудай засаг дарганар урилдаанай айлшад боложо, тайзан дээрэ уригдаад, өөһэдынгөө нютагуудай эрхим багшанарые энэ ехэ урилдаанда оролсожо хабаадаһан габьяаень тэмдэглээд, баглаа сэсэгүүдые, тус тустань бэлэгүүдые барюулаа.
Ниислэл хотодо ажаһуудаг нютаг зоной эблэлнүүд, суг хүдэлдэг ажал нэгэтэй нүхэдынь олон тоото бэлэгүүдтэй ерэжэ, багшанарые амаршалаа. Уярма һайхан баярай дүүрэбэшье, сугларһан зон таража ядаад байгаа һэн. Энэ хадаа үнэхөөрөө удха ехэтэй үйлэ хэрэгэй үнэн гэршэ болоно бэшэ гү?
Влад Ангарскийн гэрэл зураг
Автор: Василий ЦЫБИКОВ
