769
Байгша оной 11 һарын 26-27-ой үдэрнүүдтэ Буряадай ниислэл Улаан-Үдэдэ «Буряад хэлэн XXI зуун жэлдэ» гэһэн уласхоорондын ехэ хурал эмхидхэгдэхэ. Энэ хэмжээ ябуулга Эрхүү можын, Үбэр Байгалай хизаарай, Буряад Уласай Засагай газарнууд, Бүгэдэ Буряадай үндэһэн соёлой эблэл болон Буряадай гүрэнэй ехэ һургуули үнгэргэнэ.
«Буряад хэлэн XXI зуун жэлдэ» гэһэн уласхоорондын ехэ хуралда засагай газарай, болбосоролой, соёлой, эрдэмэй һалбариин, олондо мэдээсэл тараадаг хэрэгсэлнүүдэй түлөөлэгшэд хабаадаха. Тиихэдэ Ородой Холбоото Уласай можо нютагуудай - Эрхүү можын, Үбэр Байгалай хизаарай, Монголой, Шэнэхээнэй түлөөлэгшэд хабаадалсаха.
Хуралда оршон үедэ буряад хэлэнэй байдал, Эрхүү можо, Үбэр Байгалай хизаар болон Буряад Уласай болбосоролой эмхинүүдтэ буряад хэлэ болон уран зохёол заалгын түрүү практика, аша үрэтэй технологинууд тухай хэлсэхэ. Байгалай хизаарай можо нютагуудта ажаһуугшадые буряад хэлэндэ һургаха талаар дурадхалнууд оруулагдаха. Байгалай хизаарта буряад хэлэ болон уран зохёол сахин хүгжөөхэ, дэлгэрүүлхэ талаар олониитын, болбосоролой болон засаг зургаанай эмхинүүд нэгэдэжэ, ажалаа ябуулха, буряад гэр бүлын үүргэ дээшэлүүлхэ гэһэн асуудалнуудаар зүбшэхэ.
«Буряад хэлэн XXI зуун жэлдэ» гэһэн уласхоорондын ехэ хуралай дүнгүүдээр 2030 он болотор буряад хэлэнэй хүгжөөлгын холын хараата түсэб байгуулан хэлсэхэ, хуралай дүн тобшололгын резолюци абтаха юм.
Буряад хэлэнэй асуудалнуудта зорюулагдаһан хуралай хэмжээ ябуулганууд Буряад Уласай Засагай газарта, Буряадай гүрэнэй ехэ һургуулида, Буряад драмын театрта, Үндэһэтэнэй номой санда, Улаан-Үдэ хотын захиргаанда, Арадай Хуралда хоёр үдэрэй туршада үнгэргэгдэхэ.
