​Эрхүү можын амбан захирагша Сергей Левченко буряад хэлэнэй уласхоорондын хуралай хабаадагшадта баяр хүргэбэ

«Буряад хэлэн XXI зуун жэлдэ» гэһэн буряад хэлэнэй уласхоорондын хуралда хабаадагшад!

Эрхүү можын Засагай газарай зүгһөө иимэ шухала удха шанартай арга хэмжээндэ хабаа­дагшадта болон айлшадта мэндые хүргэнэб!

Ородой Холбоото Уласай үндэһэтэнэй бодол­гын стратеги бэелүүлгын ашаар гүрэн соомнай ажаһуугаа арад бүхэнэй соёл ба хэлэ һэргээн хүгжөөлгэ хангагдана. Оршон үеын эрхэ байдал­да буряад хэлэнэй талаар түрын бодолго можо нютагуудай болон олон уласай хэмжээндэ га­раха ёһотой. Тэрэнь гүрэнэй засагай зургаануу­дай, олониитын, мүн һанаата болоһон бусадшье талануудай хамтын ашаг үрэтэй харилсаанһаа дулдыдана.

Эрхүү можын Засагай газар буряад ара­дай онсолиг хадагалан дамжуулха асуудалну­удые шухала гэжэ тоолоно. Буряад соёл, хэлэ, үндэһэтэнэй тамирай зүйлнүүдые һэргээхэ талаар можо нютагай, мүн һалбари бүхэнэй хэмжээндэ бэелүүлэгдэхэ программанууд абтанхай. «Ёр­дын наадан», Сурхарбаан гэһэн ехэ нааданууд үнгэргэгдэнэ. Эдэ бүгэдэ арадай ёһо заншал сахиха, үндэһэнэй мэдэрэл түрүүлхэ, залуушуулые хүмүүжүүлхэ хэрэгтэ туһа нүлөө үзүүлнэ.

Тус хурал – буряад арадай түүхэ, хэлэ ба соёл хүгжөөн һалбаруулхада, мүн арадуудай эб нүхэсэлэй, хүршэ оршоһон можо нютагуудай ба гүрэнүүдэй хани харилсаанай улам хүгжэн батажахада, асари ехэ түлхисэ болохонь дамжаггүй. Тус Хуралай хэлсээнүүд, ашаг үрэтэй шиидхэбэринүүд бо­лон зууршалганууд буряад хэлэнэй мүнөөнэй байдалай болон саашанхи хүгжэлтынь асуудалнуудые олон талаһаа шэнжэлэн харахада, туһа болохо гэжэ этигэнэб.

Амжалтатайгаар, үрэ дүн ехэтэйгээр ажаллахыень хабаадагшадта хүсэнэб. Онсо һонин һанамжа бодолнууд соностожо, бүтэмжэтэй хэлсээнүүд гаража, бодото үндэһэтэй шиидхэбэринүүд тус Хуралай үедэ абтахань болтогой!

Эрхүү можын амбан захирагша С.Г. ЛЕВЧЕНКО