​Буряад Уласай Түнхэн аймагта сомоной дарганар һэлгэгдээ

Дамба Тыкшеев

Намарай һунгалтын үедэ Түнхэн аймагта 13 хүдөө һуурин сомоной дарганар шэнээр томилогдоод, аяар найманиинь һэлгэгдээ. Тиихэдэ аймагай зүблэлэй һунгамалнуудай 70 хубинь - шэнэ нюурнууд юм.

14 сомоной дарганарай 6-иинь эхэнэрнүүд гээд тоологдоно. Тооро, Хэрэн болон Түнхэн һууринуудта эхэнэрнүүд илаа. Хойтогол болон Мон һууринуудта сомоной һунгамалнуудай тооһоо бүһэгүй дарга шэлэгдээ. Жэмһэг һууринда Дарима Атрикова сомоной даргаар хоёрдохи болзороо һууха болобо.

Декабриин 9-дэ Хужарай сомоной даргын нэрэ һунгалтын удаа мэдэгдэхэ. Энэ үдэр Жэмһэгэй нэгэдэмэл тойрогоор аймагай һунгамалай һунгалта болохоор хараалагдана. Һонирхолтойнь гэхэдэ, Дарима Атрикова намартаа хоёр һунгалтада хабаадажа, сомоной дарга болон аймагай һунгамал боложо шадаа. Һунгалтын Хуулиин гуримаар, тэрэ Жэмһэг һууринаа толгойлхом гэжэ мэдүүлээ. Энээнһээ боложо, шэнэ һунгалта зарлагдаа.

Аймагай зүблэлэй түрүүлэгшын орлогшо Дамба Тышкеевэй хэлэһээр, 70 хуби шэнэ һунгамалнууд 6-дахи зарлалда хүдэлжэ эхилээ.

- Аймагаймнай зүблэл дүрбэн хороонһоо бүридэнэ. Һунгамалнууд ори ганса хороондо бэшэ, мүн заримдаа хоёр-гурбан хороондо хүдэлнэ гээшэ. Үнинэй хүдэлдэг һунгамалнууд һая һунгагдаһан бэшэнээ яһала һургажа байна. Юуб гэхэдэ, мүнөө үедэ бидэ унтан хэбтэнгүй аймагайнгаа бюджет зохёожо байнабди. Эндэ дүй дүршэлнай багадахаяа һанана. Тиимэһээ Буряад Уласай Арадай Хуралай ажалтай шэнэ һунгамалнуудаа танилсуулха түсэбтэйбди, - гэжэ Дамба Тышкеев мэдүүлнэ. 

Авторай гэрэл зураг