627
2019 ондо Туран һуурин ойн баяраа тэмдэглэхэнь. Энэ ушараар олон тоото хэмжээнүүд эмхидхэгдэхээр хараалагдана. Тиимэһээ бэлэдхэлэй ехэнхи ажал эхилэнхэй.
Нэн түрүүн нютагайнгаа эхиндэ “Туран” гэжэ томо үзэгүүдээр бэшээтэй стеллэ табигдаа. Һууринай байгуулагдаһан ойн баяр анха түрүүн тэндэ тэмдэглэгдээ.
2018 ондо туранайхид болон холо ойгуур ажаһуудаг зон стеллые һайхан ан амитанаар гоёохо гэжэ дурадхал оруулһан байна.
- Ямар ан амитанай дүрэ табихамнайб гэжэ ниитын сүлжээндэ һунгалта үнгэргөөбди. Наадажа байһан хоёр баабгай, огторгойдо элижэ байһан хоёр бүргэд болон буга шэлэхые дурадхагдаа. Ехэнхи зон буга шэлэн абаа. Юуб гэхэдэ, хажуудахи ой тайгамнай буга һогоонуудаар баян юм. Тиигэжэ бидэ мүнгэ суглуулжа, бугын дүрэ энэ жэл табяабди. Ерэхэ жэл тэндэмнай амаралтын газар байгуулагдажа, ажал үргэлжэлүүлэгдэхэ, - гэжэ Туранай сомоной дарга Владимир Хармакшанов хөөрэнэ.
2019 он Туран нютагай ажаһуугшадта ехэ дэмбэрэлтэй жэл болохонь гээшэ. Юуб гэхэдэ, тус һуурин байгуулагдаһаар 335 жэлэйнгээ ой тэмдэглэхэнь. Сомоной даргын хэлэһээр, һайхан найр наада үнгэргэхөө байһанаа мэдүүлээ.
- Манай ойн баярай хэмжээ ябуулгануудта Монголһоо олон айлшад ерэхээр хараалагдана. Мүн тиихэдэ Тыва Уласта Туран гэжэ хото бии гээшэ. Тэндэхи түлөөлэгшэд маанадта айлшалхамнай гэжэ хэлээ, - гэжэ Туранай сомоной дарга хөөрөөгөө үргэлжэлүүлнэ.
Эсэгэ ороноо хамгаалгын Агууехэ дайнай түгэсэһөөр 75 жэлэй ойн баярта дашарамдуулагдан, Туран һууринай совхозой хуушан дэбисхэр дээрэ Алдар солын аллей тогтоогдохоор түсэблэгдэнхэй. Дайнда хабаадаһан бүхы нютагаархидай нэрэ мүнхэлэгдэхэ. Энээнэй хажуугаар Совет үедэ үдэр һүнигүй хүдэлһэн габьяата хүдэлмэрилэгшэдэй нэрэнүүд баһа харуулагдаха.
Авторай гэрэл зураг
Автор: Борис БАЛДАНОВ
