833
Хэрэн һууринда хүүгэдэй поликлиникын шэнэ байшан үүдэеэ сэлибэ. Түнхэнэй больницын ахамад врач Дамнин Мунконовой хэлэһээр, барилга оройдоол дүрбэ һарын туршада хэгдээ.
Олохон жэлдэ хүүгэдэй поликлиникэ хуушан байшан соо оршодог һэн. Зарим хүнүүд үхибүүдээ тиишэнь абаад орохоёо айгша һэн. Юуб гэхэдэ, аяар 1930-аад онуудта баригдаһан модон байшан хуушаржа, үмхи болошоһон байгаа. Гэхэтэй хамта, хуушан байшан дотор мүнөө сагта таарама оньһон техникэ баһа асарагдадаггүй һэн.
Иимэ бэрхэшээлтэй хэдэн олон жэлдэ байһан түнхэнөөрхиниие гүрэнэй тусхай программа абарба. Шэнэ поликлиникэ Канадын түргөөр бодхоогдохо гуримаар баригдаа.
- Хүүгэдэй шэнэ поликлиникэ мүнөө сагай эрилтэнүүдтэ бүхыгөөрөө таарана. Юуб гэхэдэ, таһалга бүхэндэ оньһон техникэ худалдан абтагдаа. Һаруул кабинет соо докторнууд дуратайгаар бага үхибүүдтэй харилсана. Мүн эмнэлгэдэшье тааруу байдал тогтоогдонхой, - гэжэ ахамад врач Дамнин Мунконов хөөрэнэ.
Түнхэндэ ганса нютагай эхэнэрнүүд үхибүү түрэнэ бэшэ, мүн хажуудахи Монголой Хүбсэгэл аймагай хээлитэйшүүл эмнэлгэ гарана. Мүн тэдэнэй үри хүүгэдые эндэхи педиатр болон бусад врачнууд хангана.
Авторай гэрэл зураг
Автор: Борис БАЛДАНОВ
