765
Буряад Уласай барилгын болон гэр байрын ажахы шэнэдхэлгын яаман улас дото дулаасуулгын хаһа яажа үнгэргэгдэнэб гэжэ хинана. Энээн тухай Буряад Уласай Толгойлогшын зүблөөндэ барилгын сайд Николай Рузавин хэлэбэ.
Николай Рузавинай тэмдэглэһэнэй ёһоор, улас дотор дулаасуулгын хаһа ябаха гуримаар үнгэрнэ. Уласай котельнинуудта шулуун нүүрһэн нөөсэлэгдэнхэй. Хүйтэнэй хаһада бэлэн тухай паспортнуудын нютагай засагай байгууламжануудай 93 хубинь абанхай юм.
Тиихэдэ гурбан аймагта болон Северобайкальск хотодо түлишэ худалдан абаха хэрэгтэ мүнгэн туһаламжа үзүүлэгдэһэн байна.
- Зарим аймагуудта коммунальна хангалгын түлөө түлбэри угаа бага.Тиимэһээ зарим нютагай засагай байгууламжануудта түлишэеэ абажа шаданагүй. Буряад Уласай Кабанск, Муя, Байгал шадарай аймагуудта болон Северобайкальск хотодо туһаламжа үзүүлэгдээ, - гэжэ Николай Рузавин хэлэбэ.
Түлишэ худалдан абаха хэрэгтэ Муя аймагта - 28,4 сая түхэриг, Кабанск аймагта – 10 сая түхэриг, Байгал шадарай аймагта – 495 мянган түхэриг, Северобайкальск хотодо - 37,2 сая түхэриг уласай бюджетһээ һомологдоо.
Загарай аймаг түлишөөр хангаха талаар ажал ябуулагдана. Эндэ мүнөө онсо байдал соносхогдонхой гэжэ сайд хэлэбэ.
Буряад Уласай аймагуудай болон Улаан-Үдэ хотын ажаһуугшадай гэр байрануудта дулаан байха ёһотой гэжэ Алексей Цыденов тэмдэглэбэ. Дулаанай таһалдаха ушарай үзэгдэбэл, Гүрэнэй барилгын болон гэр байрын хиналтын албанда хандаха тухай уласай хүтэлбэрилэгшэ хэлэбэ. Ажаһуугшадһаа энэ албанда хандалгануудай оробол, шууд шиидхэбэринүүдые абаха тухай Алексей Цыденов даалгаба.
