​​Жэшээтэ үйлэдбэри

Европын гүрэнүүдтэ ажаһуудаг зон бүхы эдеэнэйнгээ 10, ехэдээл һаа 15 хубииень халуун дээрэнь эдинэ. Бусад хоолынь жабар хүргэгшэдэ хада­галаатай байдаг юм.

Сергей Севрюков хорин шахуу жэлэй туршада банкын мэргэжэл­тэнээр алба хаагаа. Табан жэлэй саана банкын ноёдтой үгэеэ ойл­голсохонь бэрхэ болоод, энэ ажалаа орхёо. Баян дүй дүршэл олоһон тула ажалаа хаяад, удаадахи жэлнүүдэй туршада мэргэн зүбшэлнүүдые мүнгөөр тараажа байһанаа, хоёр жэлэй саана үйлэдбэридэ хам орохо гэжэ шиидээ.

Хүнэһэ хүргэдэг эмхиин шалга­жа ороходонь, тэрэнь ямаршье олзо оршогүй, үри шэридээ баригда­жа, панхаруутаха туйлдаа хүрэһэн байба. Харин мүнөө энэл заводто хүргэгдэһэн хоолой зүйлнүүд байгу­улгаяа олзоор сохом хангажа захал­ба. Эзэдынь һая нааша үйлэдбэриеэ арба дахин ехэ болгохо тухай түсэб зохёонхой.

Хаанаһаа эхитэйб?

Екатеринбург хотын дэргэдэ ор­шодог Исток һууринда ногоо, жэ­мэс, һархяаг хүргэжэ наймаалдаг байгуулга 1990-ээд онуудһаа хойшо хүдэлнэ. Удаан сагай туршада тэндэ Польшоһоо ерэһэн ургамал гадар­лагдадаг һэн. Холын гүрэнһөө но­гоон эдеэ асаржа, Екатеринбургда гадарлахань мүнгэнэй талаар бо­доходо, удхагүй хэрэг гэжэ эзэдынь 2013 ондо ойлгоо. Ушар иимэһээ өөрын үйлэдбэри зохёон байгуул­ха тухай шиидхэбэри абтаба. Гурбан жэл тухай хүдэлөөд байхадаа, үйлэдбэри хүтэлбэрилхэнь хэсүү болобо гэжэ тэдэнэр сээжэдээ шэн­гээгээ.

«Би 2016 оной хабар энэ байгуул­гада үйлэдбэриин эзэдэй урилгаар ажалда орооб. Үе-үе болоод лэ туша­агдадаг тоосоонууд соо гоё гоёор бэшээтэй, харин эдэй засагай талаар ушарһан бодото байдалынь тад он­доо байдаг байгаа ха юм. Ажалшадай салин сагтаа тэдэнэртээ хүрэхэгүй, үйлэдбэри хүгжөөхэ гэхэдэ, хан гэхэ мүнгэншье байхагүй, задагай оньһон түхеэрэлгэнүүд, хулгайша хүдэлмэрилэгшэд ерэхэдэмни но­ёдойнгоо толгойдо ёстой тодхор татажа эхилээд байба», - гэжэ Сер­гей Севрюков хөөрэнэ. Эхилхэдээ, Сергей шалгагшаар ерэһэн байгаа. Хиналтадаа абаһан байгуулгань ор­шон байдалда олзо оруулха аргатай гү гэһэн асуудалда тэрэ харюуса­ха зэргэтэй һэн. Үдэрэй сүлөөгөөр ажалда ороһон аад, мүнөө болоходо, ноён тушаалтай, эзэдэйнь нэгэн бо­лоод байжа байна ха юм.

«Урда жэлнүүдтэ ороһон хүрэнгэжүүлгын шалгалта һэльбэн шэнэлэлгэ болон хүгжөөлгэ ябу­улдаг Европын банк болон Эдэй засагай хүгжөөлгын яамантай суг бүтээбэбди. Тиигэн гэхэдэмнай, хүгжэлтын түсэб табибалнай, энэ байгуулгын ерээдүй нилээдгүй һаруул байна гэжэ элирбэ. Жэмэс хүргэдэг оршон сагай оньһонуудые Европын банкын мүнгөөр аба­ха гэжэ байтарнай, тус эмхимнай хашалганда орожо, ажалаа хуря­аба. Тиихэдэнь шахардуу байдал­да бидэ орообди. Ушар юуб гэхэдэ, эрхим техникэ имагтал Европын гүрэнүүдтэ үйлэдбэрилэгдэнэ ха юм. «Амитан аргатай» гэдэг арадай үгэ аргагүй сэсэн байжа, Италида, мүн тиихэдэ Голландида бүтээгдэһэн үйлэдбэриин хоёр залгалаа гартаа оруулжал һалаабди», - гэжэ Сергей Севрюков хөөрэхэ зуураа хараһаар байтар маһайна.

Банкда 18 жэлэй туршада Сер­гей ялас гэмээр хүдэлһэн юм гэжэ уншагшадтаа һануулая. «Гүрэнэй хэмжээн дээрэ хүдэлдэг нэгэ бан­кын нэгэ хэлтэсые хүтэлбэрилдэг һэмби. Ноёднай, минии һанахада, гажа буруу шиидхэбэринүүдые аба­жа эхилээ. Би тэдэнииень буруушаа буруушааһаар, арсалдаһаар арсал­даад, ажалаа орхёошомни дээрэ гэжэ бодооб. Жэл хахад болоодүй байтар, банк Ород гүрэндэ хүдэлхэ эрхэеэ хаһагдаад, хосороо һэн даа», - гэжэ дурсаха зуураа манай хөөрэлдэжэ байгааша нүхэрнай өөрыгөө зүб байһанаа гэршэлбэ даа.

Үдэр бүри гэмгүй хэжэ байһан гол ажалайнгаа хажуугаар Сергей 2006 ондо «Загаһашан» гэжэ ниитэ гаршагтай шэнжэлхы бүлгэм зохёон байгуулба. «Эхилхэ дээрээ манайхин имагтал банкнуудта туһа хүргэдэг һэмди. Тэдэнэй эзэд гүрэнэй зүбшөөл данса абаха, хүдэлмэриеэ үргэдхэхэдөө, хубиимни эмхидэ хан­дадаг байгаа. Удаань, 2012 он бага­ар, мүнгэ хүрэнгэтэй баяшуул манай хангалтануудаар һонирходог болоо. Хүрэнгэжүүлгын түсэлнүүд дотор нэбтэрһэн алдуунуудыень заһажа, энэ-тэрэ үйлэдбэринүүдэй ажал ябуулга мүнгэнэйнь талаар шалга­жа, зарим тээ шэнэ үйлэдбэри зо­хёожо, манай мэргэжэлтэд эхилһэн байгаа», - гэжэ Сергей хөөрэхэдөө, «Ураалай жэмэсүүд» гэжэ байгуул­гада ажалтай болоходоо, хоб жэбтэ дуратайшуулда «ээлжээтэ хооһон тархиие ажалда абаба даа» гэжэ со­хом хэлсүүлхэгүй байһанаа харуул­на гээшэ.

Алдуу эндүү усадхалган

2016 ондо Zamorozka.Pro байгу­улга панхаруутаха туйлдаа хүрэнхэй һэн. Һанаад үзыт даа, байгуул­гын гарзанууд олзоһоонь 2,5 да­хин ехэ байхадаа, үхэлэй амисхаал хүдэлмэришэдэйнь нюрганда хүйтэ даалгангүй яахаб?

«Байгуулгын гол түсэл эхинһээнь тад буруугаар зохёогдоһон бай­гаа. Тэрээнһээ уламжалан, үйлэдбэришье гажа буруугаар зо­хёогдоо. 70 түхэриг гаргашалжа үйлэдбэрилһэнөө 32 түхэригөөр дэлгүүр дээрэ наймаалдаг зон баян болохо аал? Ёһоорхон бизнес байгаа даа», - гэжэ үгэлхэдөө, Сергей эльгэ хатаадхина. «Үшөө нэгэ жэшээ дурдаһуу. Хорин тонно багтаамжа­тай ашаанай машинын жолоошондо 20 мянган түхэриг түлөөд, 20 тон­но эдеэнэй зүйл абаашуулбалнай, ашааниинь нэгэ түхэригөөр үнэтэй болобо гэжэ тоолоё. Харин энэл ма­шинадаа оройдоол 10 тонно ашаад ябуулжархибалнай, тэрэл хоолной 2 түхэригөөр үнэтэй болохо байна. Энэ хүн бүхэндэ ойлгосотой бэзэ? Байгуулгада тодхогдоһон оньһон түхеэрэлгэнүүд хүсэд дүүрэнээр ашаглагдадаггүй һэн тула, гарза­нуудыньшье ехэ болонгүй яахаб?» - гэһэн асуудал табина олзын хэрэг эрхилэгшэ.

Байгуулга ёһо гурим соонь хүдэлгэхын тула Сергей 250 сая түхэриг оруулба. 40 сая түхэриг урьһалха баатай болоо. Гэбэшье, уураг тархиһаань утаанай гаратар бодомжолжо зохёоһон үйлэдбэри үри һаариһаа удангүй сүлөөлхэ ша­далтай.

Нюдэ сабшаха зуура хүрэһэн хартаабха амтатай даа

Zamorozka.Pro байгуулга даб дэ­эрээ 80 янзын эдеэ нюдэ сабшаха зуура хүргэнэ. 2017 оноо энэ ком­пани 120 сая түхэриг олзотойгоор дүүргээ. Харин энэ жэлэй эсэслээдүй байтар мүн лэ 120 сая түхэриг олоод байна.

«Хүрэһэншье һаа, хара боро үнгэтэй болошоһон хартаабха дэлгүүртэ харабал, тэрэниие абахаяа дурантнай гутаха. Харин манайхин хартаабхаяа хүлдэхөөжэрхихэгүйн тула урид шанаад, хүргэгшэдэ хэ­нэбди. Тэрэнэймнай ашаар тэрэм­най үнөөхил зандаа байдаг», - гэжэ Сергей олон үгэдөө найраад, олон нюусануудайнгаа нэгые тайлбарил­жархиба.

«Үнгын жамбын хапууса, янза бүриин жэмэс, алим болон халу­ун зунай үедэ хуряагдадаг бусад ургаса Zamorozka.Pro байгуулгын хүргэгшэнүүд соо хадагалаатай бай­даг. Намар болоходонь, тэдэнэй бай­рада луйван, хартаабха болон бусад түмһэнүүд тэдэниие орлодог.

Үбэл тээшэ улаан шүлэ гар­гажа ууха бэлдэбэри хоол ехээр хүргэгдэдэг.

Эдэ болон бусад ажалаа ша­нар һайтайгаар хэхын тула бүхэли жэлэй туршада 25 хүн ажал хэнэ. Дулаан болоходонь, саг зуурын хүдэлмэринүүдтэ хоёр зуугаад хүн хабаадуулагдана. Эндэ хүдэлмэридэ ороһон хүнүүд һарадаа дунда зэргэ­эр 25 мянган түхэриг олоно.

Ураал можодо ажаһуудаг олзын хэрэг эрхилэгшын энэ жэшээе халан абаад, баян дээрээ баян, мүнгэн дээ­рээ мүнгэтэй болохо шадалтай буря­адууд «Буряад үнэн» уншагшадайм­най дунда сохом бии гэжэ этигээд, энэ хөөрөөгөө битнай түгэсхэһүү.