​​Гар утаһанай ашаар - газаашалагдахагүй

Түрэхэһөө гү, али гэмтэһэн ушарһаа нюдэ һохор, хараа муутай болоһон зоной бай­дал хэзээдэшье бэрхэшээлтэй. Үнгэтэ юртэмсые нюдөөрөө харангүй ябаха гээ­шэ хэсүү бшуу.

20 наһатайдаа хүндэ үбшэндэ дайруулжа, ха­рахаяа болиһон Марина Асхадуллина хүнтэй үргэлжэ дахалдаад ябаа. Марина дэлгүүр ошоод, тиимэ үнгэтэй самса хэрэгтэй гэхэдэнь, наймаа­шад тад ондоо үнгэтэй хубсаһа худалдажархидаг һэн. Тиихэдэнь Марина нюдэ һайтай нүхэдтэеэ дэлгүүр ошодог болоо. Гадна харгы хүндэлэн га­раха, хамтын унаада һууха гэхэ мэтын олон бар­шадтай үдэр бүриин байдалдаа тэрэ ушарна ха юм.

Смартфоной аргаар Марина болон бусад хараа муутай эрэмдэг зоной ажабайдал гансата хуби­лаа. Шэлжүүлэгдэһэн тусхай программын ашаар мүнөө эрэмдэг зон хаанашье гансаараа ябаха ар­гатай.

Нижний Новгород хотодо эмхидхэгдэһэн хараа муутайшуулай һуралсалда Буряад Уласһаа Алек­сей Зеленов Марина Асхадуллина хоёр оролсоһон байна. Мүнөө тэдэ хоёр Улаан-Үдэеэ бусажа, бусад хараа муутайшуулда һураһанаа дамжуулжа эхи­лэнхэй.

- Мегафон компаниин мүнгэн дэмжэлтээр энэ һуралсал эмхидхэгдээ. Бидэ хоёрой харгыемнай, байрыемнай, эдеэ хоолыемнай энэ эмхи өөр дээ­рээ даажа абаад, һуралсал гаргаба, тиигэжэ баг­шанар болобо гээшэбди, - гэжэ шоглон Алексей хөөрэнэ.

«Мегафон» эмхи хоёр жэлэй туршада Ородой Холбоото Уласай 25 регионһоо үндэр технологи һайнаар хэрэглэдэг эрэмдэг зониие һургажа байна. Тэрэ һуралсал гараһан зон абаһан мэдэсээрээ бусадтай хубаалдана.

Смартфон бүхэн өөрын тусхай программа­тай байна. Айфон, Айпад болон бусад шанга арга боломжотой смартфонууд соо хараа муу­тайшуулда амин шухала программанууд һайнаар шэлжүүлэгдэнхэй. Харин Андроид болон бусад юрын телефонуудай арга боломжо хизаарлагдан­хай.

Марина Асхадуллина өөрынгөө ухаалиг гар утаһанай аргаар хайшан гэжэ мүнгэеэ тоолохоб гэжэ харуулна. Саарһан мүнгэеэ телефондоо абаашахадань, дары тэды мүнгэн гэжэ хэлэгдэнэ. Хаана байһанаа асуугаад, смартфоноо дүрбэн зүг руу шэглүүлхэдэ, гудамжануудай нэрэ хэлэгдэхэ аргатай. Ямар нэгэ юумэ баряад, ямар үнгэтэйб гэхэдэнь, смартфон соохи программань дары түргэн хэлээд үгэнэ. Ном гү, али кассетэ баряад, смартфондо дүтэлүүлээд, юун гэжэ нэрэтэйб гээд лэ, зүб харюу абана. Эдэ болон үшөө олон арга бо­ломжонуудые хайшан гэжэ хэрэглэхэ тухай Ма­рина Алексей хоёр хараа муутай эрэмдэг зондо заажа үгэбэ. Үндэр технологиин арга боломжоор эрэмдэг зоной үдэр бүриин ажаһуудал иигэжэ һайжаруулна гээшэ.