807
Декабриин 15-һаа хойшо Ородой Холбоото Уласай ажаһуугша бүхэн дв2025.рф. гэһэн сайтда орожо, Алас Дурна зүгэй хүгжэлтын Үндэһэтэнэй программада дурадхалнуудые оруулха аргатай. Тус хэмжээ ябуулга 2025 он хүрэтэр, мүн саашадаа 2035 он болотор Алас Дурна зүгэй хүгжэлтын Үндэһэтэнэй программа бэелүүлхэ зорилготойгоор эмхидхэгдэнэ.
«Ородой Холбоото Уласай Юрэнхылэгшэ Владимир Путин 2025 он болотор Алас Дурнын хүгжэлтын программа байгуулха даабари үгэһэн байна. Энэ ехэ хэмжээ ябуулгада Ород гүрэнэй, тэрэ тоодо Алас Дурнын федеральна тойрогой ажаһуугшадые хабаадуулха хүсэлтэйбди. Алас Дурнын хүгжэлтын һалбаринуудые элирүүлжэ, ажаһуугшадай байдал һайжаруулха зорилготойбди. Энэ хэмжээ ябуулгада хүнүүд эдэбхитэй хабаадажа, Алас Дурнын зүгтэ ажаһуугшадай эрилтэнүүдтэ тааруу программа баталагдаха гэжэ найданабди», - гэжэ Ородой Холбоото Уласай Алас Дурнын зүгэй хүгжэлтын талаар сайд Александр Козлов хэлэбэ.
Дурадхалнуудаа оруулха гэбэл, сайтда бүридхэлдэ абтажа, хаана ажаһуудаг, гар утаһанайнгаа дугаар, мэргэжэл, түрэһэн үдэр тухайгаа мэдээ орхихо хэрэгтэй. Хүн бүхэн сайтын таһагуудта хэдышье дурадхал оруулха аргатай. Тиихэдэ Алас Дурнын бүхы федеральна тойрогой болон тойрогой бүридэлдэ ородог можо нютагай гү, али тодо һууринай хүгжэлтын талаар дурадхал оруулжа болоно.
2018 оной декабриин 25-да оруулагдаһан дурадхалнуудаар дв2025.рф. гэһэн сайтда һанал хуряалга эмхидхэгдэхэ. Тиихэдэ хүгжэлтын һалбаринуудаар Алас Дурнын тойрогто ажаһуугшад дуугаа үгэхэ юм.
Декабриин 31-дэ дв2025.рф. гэһэн сайтда мэргэжэлтэ шүүбэришэдэй модуль хүдэлжэ эхилхэ. Эндэ хуули-эрхын дансануудай түсэлнүүд, Алас Дурнын хизаарай хүгжэлтын түсэбүүд, хэмжээ ябуулгануудые үнгэргэхэ талаар эдэй засагай үндэһэн баримта хэблэгдэхэ. Тиихэдэ хабаадагшад эдэ дансануудаар һанамжаяа бэшэхэ, хуралдаанда хабаадаха, шэнжэлэлгын материалнуудые бэлдэхэ аргатай. Мэргэжэл тухайгаа, эрдэмэй зиндаа, Мэргэжэлтэ шүүбэришэдэй эблэлдэ, федеральна болон можо нютагуудай засагай газарта ажалай бүлэгүүдтэ хүдэлһэн дүршэлтэй, эрдэмэй толилолгонууд тухай мэдээсэл оруулһанай удаа эдэ бүгэдэдэ хабаадаха арга олгогдоно.
Алас Дурнын хүгжэлтын талаар Үндэһэтэнэй программа байгуулагдаһанайшье удаа дв2025.рф сайт ажалаа үргэлжэлүүлхэ.
2019 оной сентябрииин 1 болотор Алас Дурнын хүгжэлтын талаар Үндэһэтэнэй программа байгуулагдаха ёһотой. Тиихэдэ Үндэһэтэнэй программын шухала һалбаринуудай нэгэн хадаа ниигэмэй һалбари болоно. Эндэ гэр байра, гэр байрын ажахынууд, ашаа тээбэри, элүүрые хамгаалга, соёл, тамир, эдэй засагай болон эрдэм ухаанай хүгжэлтэ тэмдэглэмээр.
