​Буряад Уласта хүнгэлэлтэтэйгөөр гэр худалдан абаха арга бии

Декабриин 17-до Буряадай Засагай газарта барилгын сайд Николай Рузавин үнэгүй урьһаламжа үгэхэ программын хэр бэелүүлэгдэжэ байһан тухай тоосоо. Байгша оной январиин 1-эй һүүлээр хоёрдохи болон удаадахи үхибүүтэй болоһон гэр бүлэнүүд иимэ хүнгэлэлтэдэ хүртэхэ эрхэтэй юм гэжэ һануулая. Тэдэнэй ипотекын урьһаламжаар шэнэ гэр худалдан абахадань, түрэсэтэй түлбэриинь хэмжээнэй 6 хубиһаа дээшэ гараашыень гүрэн даажа абадаг. Туһаламжын болзор 3 – 8 жэл.

Буряад Уласта энэ программаар байгша оной ноябриин 1-эй байдалаар 5 мянга гаран урьһаламжа үгтэнхэй гэжэ багсаамжалагдана. Ушар тиимэһээ Буряадай Толгойлогшо Алексей Цыденов уласай Ниигэмэй хамгаалгын яаманиие иимэ гэр бүлэнүүдтэ, харин банкнуудые ба аймагуудай засаг дарганарые хүн зондоо тус программа тухай дуулгажа байхыень уряалаа.

“Энэ программада анхаралаа хандуулха хэрэгтэй. Ехэ һайн программа. Олон хүүгэдтэй гэр бүлэнүүдые бодото дээрээ дэмжэхээр”, - гэжэ Алексей Самбуевич онсолоо.

Жэшээнь, хэрбээ гэр бүлэ урьһаар гэр абажархинхай һаа, тэрэнээ үнэгүй болгохо аргатай. Харин хүнгэлэлтэтэйгөөр үриеэ түлэдэг һаа, болзорынь табан жэлээр һунаагдаха. Тиигэжэ гүрэн найман жэлэй туршада туһалжа байха болоно.

Программа 2018 оной январиин 1-һээ бэелүүлэгдэжэ эхилээд, 2022 оной декабриин 31 болотор үргэлжэлхэ. Тиимэһээ энэ болзорто хугасааһаа урид ба һүүлдэ түрэһэн хүүгэдтэй гэр бүлэнүүд тус гүрэнэй дэмжэлгэдэ хүртэхэгүй.

Программын гол эрилтэнүүд:

үхибүүн заабол хараалагдаһан хугасаада түрэһэн байха ёһотой (2018 оной январиин 1 – 2022 оной декабриин 31);

худалдажа абтаһан гэр шэнэ байха ёһотой, хуушан гэртэ энэ дэмжэлгэ үзүүлэгдэхэгүй;

гэрэй сэнгэй 20 хубииень заабол тэрэ дороо түлэхэ хэрэгтэй (урьһаламжын хэлсээгээр энэ түлбэри хараалагдана);

гэр байрын сэн тогтоогдоһон хэмһээ – 6 сая түхэригһөө үнэтэй байха ёһогүй.

Программын болзорой дүүрэхэдэ, гэр бүлэ урьһаламжаяа хэлсээ баталһан үдэртэнь хүсэндөө байһан Россиин Банкын үндэһэн түрэсын үнэ сэнгээр түлэхэ.

Урьһаламжые гүрэнэймнай аралжаа наймаанай банкнууд болон Ипотекын гэр байрын урьһаламжын агентство үгэнэ. Программада хабаадаха тухайгаа мэдүүлгэ оруулһан лэ банкнуудһаа хүнгэлэлтэтэй урьһаламжа абахаар. Ородой Холбоото Уласай Сан жасын яаманай 2018 оной февралиин 19-эй захиралтаар, тус программада 600 миллиард түхэриг үгтэжэ, 47 банкда хубаарилагданхай юм. Буряадай дэбисхэр дээрэхи банкнуудые нэрлэбэл, “Сбербанк России”, “ВТБ”, Россельхозбанк, АТБ болон Уласай ипотекын корпораци.