​Буян үйлэдэлгын марафон Буряад Уласай Захаамин аймагта үнгэргэгдэбэ

Декабриин 15-да Захааминай Соёлой ордон соо Арьяа-Баала бурхан бодисадын хүрэл хүрэг бүтээлгэдэ буян үйлэдэлгын марафон үнгэргэгдөө.

Захаамин аймагай соёлой байшанда декабрин 7-hоо - 14 болотор олон ламанар түрүүшынхиеэ Захааминда Арьяа-Баалын Мандала элhээр бүтээгээ. Энэ буянта хэрэгэй үедэ олон һүзэгшэд ерэжэ мүргөө, хандиб үргөө.

Декабрин 15-да үглөөнэй 10-hаа ехэ хурал хурагдаа. Удаань Мандалын элhэн сугларһан зондо тараагдажа, үлөөшэнь Зэдэ гол руу табигдаа. 13.00 сагһаа 18.00 болотор буян хэшэгэй марафон олондо мэдээжэ артистнуудай, олониитын эдэбхитэдэй, Заншалта Сангхын, засаг зургаанай түлөөлэгшэдэй хабаадалгатайгаар үнгэрһэн байна. Буян үйлэдэлгын марафоной үедэ хүн бүхэн мүнгөөршье, үхэр малааршье, хони хурьгааршье хандиб үргөө.

Тус хэмжээ ябуулгада аймагай арадай болон жэшээтэ дуу хатарай 18бүлгэм, нютагуудай бэлигтэйшүүл, Улаан-Үдэдэ ажаһуудаг солото нютагаархид ирагуу дуунуудаа хангюурдажа, хатар наадаа дэлгээ.

Долоон сагай туршада Заяа хамбын Диваажанай орон гэжэ нэрлэһэн Санага нютагай Даша-Пүнсэглинг хиидэй дэргэдэхи Улаан-Зураада тогтоогдохо туулай ехэ Арьяа-Баалын хүрэл барималай бүтээлгэдэ 1 сая 600 мянган түхэриг хандиблагдаа.