​​Оролдолго гаргагшадта олзотой жэл

Манай буряад арад жэлэй туршада хоёр дахин Шэнэ жэл угтадаг. Сагаалганаа хуулита ёһоор тэмдэглэдэг болоһомнай һайшаалтай. Үнэн алдартанай Шэнэ жэл январиин 1-дэ эхилжэ, зүүн арадуудай зурхайһаа дулдыдадаггүй. Зүүн зүгэй литын ёһоор, 12 амитадай нэрээр жэлнүүднай нэрлэгдэжэ, һубарилдан гарахадань, тусхай зурхай зурагдадаг. Харин мүнөө сагта ямар жэл гарахаб гээд, бүхы зон һонирхожо, тэрэ зурхайгаар Шэнэ жэлые угтахаа хүсэдэг болонхой. 2019 он хадаа шара шорой гахай жэл тэмдэгтэй. Манай литын ёһоор, Сагаан һарамнай 2019 оной февралиин 5-да хүрэжэ ерэхэ. Гэбэшье, ямар жэл байхаб гээд, зугаа эхилэн, зурхайн тэмдэглэлтэнүүдые дурадханабди.

Амгалан тэнюун бай­далда дуратай Гахай жэлдэ үнгэрһэн жэлнүүдэйнгээ тоосоо хэхэдэ таатай. Ажал хэрэгүүд, туйлаһан амжалта ба панхаруутаһан үйлэ яба­далнуудаа бултыень шэн­жэлжэ, хэн намда туһатай, һайниие һанажа ябааб, хэн намайе уруу даража, һаалта тушаа боложо байгааб гэжэ дүн согсолон гаргаха хэрэг­тэй. Хажуугаар байһан муу зонһоо һалажа, хэзээ нэгэ­тэ эбээ таһарһан нүхэдтэеэ эблэрхэ шухала. Гахай ха­даа уруугаа хараад лэ, газар малтажа юрэ ябадаг бэшэ, харин хүхюу зугаатай ами­тан ха юм. Тиимэһээ шэнэ һанал бодол, һонин уршаг­та ябадалнууд заатагүй энэ жэлдэ тантай тохёолдохо. Шара гахай хоншоортоо олон һайхан бэлэг асархал байха.

2019 ондо мартагдашагүй һонирхолтой ажаһуудал ерэ­хэ. Ажамидарал гээшэ жэгтэй һайхан юумэн гэжэ этигэжэ, баяртай, жаргалтай байдал­даа баясахат. Олонхи зон хэзээ нэгэтэ хүрэжэ ерэхэ баян тар­ган байдал хүсэн хүлеэхэеэ болижо, мүнөөдэрэйнгөө бай­далай жаргал мэдэрхэ. Энэ жэлдэ тон жаргалтайнууд – уһанай һуудалтай Рак, Скор­пион, Загаһад тэмдэгтэйшүүл. Тэдэ алишье үйлэдэ илалта туйлаха, юуб гэхэдэ, хуби за­яан шанга, эрид хүсэгшэдтэ дуратай бшуу. Гэхэ зуура, бүхы зоной һанаһан, хүсэһэн юумэн заатагүй бүтэхэ. Бүхы юртэмсэ энээнэй түлөө орол­дохо бшуу.

Гахай гээшэ хэрэлдэхэ, үһэрилсэхэ дурагүй, амга­лан байдалда дуратай ами­тан хадань, гаража ерэхэ Шэнэ жэлнай амгалан нам­дуу, хүн зон болгоомжотой, бодомжолготой байха. Энэ жэлдэ хүн бүхэн али нэгэ зүрилдөөтэ байдалһаа ходор­жо, хэлээ ойлголсохо, эблэрхэ. Гахай жэл түби дэлхэй дээ­рэ үнэн сэхээр, ухаатайгаар хүтэлбэрилэгшэдые дэмжэ­дэг. Эрид ябадалда дурагүй хадаа арад түмэндөө жаргал үзүүлхэеэ оролдохо.

Гахай эсээб гэжэ мэдэхэгүй, эсэн сусангүй ой модоор тэ­нэжэ, тэжээл хоолоо олоод лэ ябаха. Тиимэһээ хүхюутэйгээр, байһан байдалдаа баяртай­гаар ажаһуубал, Гахай жэлэй хамгаалга доро ажана тэнюун ажаһуухал хабди.

Гахай гээшэмнай гүн уха­атай, дээдын нарин сэдьхэл­тэй амитан, аюулта байдал холоһоо мэдэржэ, усадхахаяа оролдодог. Һайн сэдьхэлтэй, урагшаа һанаатай, ажалша бэрхэ, амжалтада тэгүүлдэг зониие Гахай жэл дэмжэхэ. Энэ жэлэй нүлөөгөөр хүн бүхэн хүгжэхэеэ оролдохо, урдань ушарһан бэрхэшээлнүүдһээ айнгүй, амжалта туйлахые хүсэлжэ, эгээл хатуу хүшэр асуудалнуудые шиидхэхэеэ шамдаха. Байра дээрээ гараа һула табяад лэ ажаһууха бэшэ, эрдэм мэдэсэеэ дээшэлүүлхэ, аяншалха, хүн зонтой харил­сахада, ехэ һайн байха. Энэ жэлдэ үмсын хэрэг эрхилхэдэ, ажалай харгыгаар дээшээ бо­дохо арга олдохо. Эрдэмтэд­тэ, шэнжэлэгшэдтэ угаа һайн байха. Гэбэшье, ямаршье мэр­гэжэлтэй зон оньһон аргада дүршэжэ, өөдөө болохо зэргэ­тэй.

Мүнгэн зөөри тухай хэ­лэбэл, зунай болон нама­рай хаһада олзо оршотой байхат. Ехээр оролдобол, олзо заатагүй ерэхэ. Эл­дэб хэлсээнүүдые баталжа, ажаһуудалайнгаа байдал һайжаруулжа болоно. Гэхэ зуура, урьһаламжаар мүнгэ абалтагүй, һөөргэнь үгэхэдэ, бэрхэшээлтэй.

Хүхюу зугаатай Гахай жэл гансаараа ябаһан залуушуул­да хани нүхэртэй болохыень хамһалсаха. Харин гэр бүлэтэй зон үхибүүдтэй болохые түсэблэхэ. Гахай жэлдэ айл боложо гэрлэгшэд жаргалтай байха. Энэ жэлдэ ганса хүн зоной харилсаан бэшэ, мүн гүрэн түрэнүүдэй харилсаан һайжарха. Гансал энхэ элүүр байдалдаа гахай хайша хэрэг хандадаг, тиимэһээ бэе маха­бадтаа анхаралтайгаар ханда­жа, эмшэд, аргашадта саг со­огоо үзүүлжэ байха шухала.

Байгаалиин уларилай шэнжэ тухай хэлэбэл, гахай гээшэмнай өөрсэ һанаатай амитан ха юм даа. Тиимэл хадань, байгаалиин элдэб оһолто ушаршье тохёолдо­жо магад. Гэхэ зуура, 2019 он бүхыдөө һайн, үргэн арга бо­ломжонуудые хүн зоной урда дэлгээнэ, гансал оролдожо, хүсөөрөө, ухаан бэлигээрээ туйлахал хэрэгтэй.