​​"ЗОЛГОЁ!" гэһэн уряа тогтоон абыт, хүндэтэ уншагшаднай

Золгохо ёһо Сагаалганай гол гуримуудай нэгэн болодог. Тиимэһээ морилхоо байһан Буряадай ехэ һайндэр угтуулан золголго гэһэн ёһо тухай хэлсэхээр болообди. Буряад Уласай Засагай газарай түрүүлэгшын орлогшо Вячеслав Цыбикжаповай ударидалга доро Сагаалганай баяр тэмдэглэхэ зарим асуудалнуудаар суглаан үнгэргэгдэһэн байна. Тэрэ суглаанда золгохо ёһо, хүүгэдэй Сагаалган, ёохор наадан тухай ехэ хөөрэлдөөн болоо һэн. Тиигэжэ энэ жэл ба хожом саашадаа Сагаан һарынгаа золгохо ёһо заншалые зүб сахидаг болоё гэһэн уряа тарааха тухай шиидхэбэри абтаа.

«Буряад-ФМ» радиогой захирал Жанна Дымчикова: «Золгохо гээшэ ехэ хүндын тэмдэг»

Золгохо тухай унша­ха, тайзан дээрэ хаа-яахан харахаһаа бэшэ, золгожо байһан зониие харангүй хүмүүжэһэн Совет үеын зоной тоодо ороноб. 2003 ондо дүү басаганта­яа Монгол сайхан орондо Сагаан сар угтажа, арад зо­ной золгохые нюдөөрөө хаража, өөһэдөөш монгол түрэлхидтэеэ нилээн оло да­хин золгоо бэлэйбди. Юушье түрүүшынхиеэ хэхэдэ, һонин байдаг, анха удаа таниха, танигдаагүй зонтой золго­жо байхада, баһа нэгэ шэнэ туршалга болоо һэн. Тэрэ­нэй һүүлдэ амидаралдаа энэ ёһолол сахидаг, золгохо уша­рай болоо һаань, гуримаарнь золгодог болооб.

Һүүлдэ 2007 ондо Шэнэ­хээнэй түрэ дээрэ хүндэтэ худа урагуудайнгаа буухада, эрэшүүлые золгон угтажа байхые хараад, ганса Сагаан һарын үедэ золгохо бэшэ, ехэ айлшадай буухада золго­хо ёһо арадаймнай заншал­да байна гэжэ ойлгооб. Нээ­рээшье, энэмнай миин юрэ юумэн бэшэ, хүндын тэмдэг болоно. Психологииншье та­лаар харабал, баһал зүйтэй олон юумэ тэмдэглэхэ байха. Арадай ёһо гуримуудаар хүн зоной хоорондохи харилсаа тодорхойлно ха юм.

Манай золгохо зан­шал дүүнь ахатанаа хүндэлжэ, тэдэнээ ходо дүмэн дүнгэн ябахабди гэһэн сэсэн бодолтой. Тиимэһээ энэ гуримые үнэн ажами­даралдаа оруулая, гэртээш, ажалдааш золгон, Гахай жэ­лээ угтая!