1065
Сагаан һарамнай иигэһээр морилхонь. Үбгэ эсэгэнэрэйнгээ үндэһэн заншал һэргээн, бүгэдэ буряад арад зон шэнын нэгэндэ бэе бэеэ золгодог байя гэһэн уряа “Буряад үнэн” Хэблэлэй байшан тараажа эхилбэ. Ушар тиимэһээ золгохо заншалые Буряадай мэдээжэ зон хайшан гээд ойлгоноб гэһэн асуудал табижа, харюунуудыень хэблэнэбди. Удаадахи дугаарнуудта үргэлжэлэлынь байха гээд найдуулнабди.
Зоригто Цыбикмитов, Буряад Уласай Арадай Хуралай Бюджедэй, налогуудай болон сан жасын талаар хорооной түрүүлэгшэ:
- Золгохо гээшэ буряад арадаймнай заншал болоно. Илангаяа Сагаалганай үеэр аба эжыгээ, түрэл гаралаа заатагүй золгонобди. Би наһанайнгаа нүхэртэй хамта шэнын нэгэндэ нютагаа ошожо, нэн түрүүн Светлана Дампиловна эжыгээ, Зинаида Чимбижаповна хадам эжыгээ золгодогби. Тиихэдээ хүндөө мэдүүлнэ гээшэбди. Хэрбэеэ урид үхибүүдээ дахуулаад ябадаг һаа, мүнөө тэдэмни томо боложо, айл бүлэ болонхой тула, бидэ хоёроо золгохоо ерэнэ. Иигэжэл үеһөө үедэ заншалаа дамжуулнабди.
Баир Турбянов, П. Чайковскиин нэрэмжэтэ Уралигай колледжын захирал:
- Золгохо гээшэ наһатайшуулаа Сагаалганаар, наһа нэмэһэнэй баяраар амаршалха ёһо гэжэ ойлгоноб. Минии бага байхада, сай, нюур гарай аршуул, хүзүүнэй орёолто мэтын бэлэгүүдые эжы абамнай бэлдээд, ахамад зоноо золгодог байгаа. Эгээл түрүүн нагаса абатандаа шэнын 1-дэ Тоороһоо Зүүн-Мүрэн зорижо ошодог һэмди. Түрэлэйнгөө аха эгэшэнэртэ бултандань лэ Сагаалганай үедэ хүндын тэмдэг үзүүлдэг байгаалди даа. Теэд тэрэ үедэ мүнөөнэйхи шэнги үргэн дэлгэр найр болодоггүй, арад зон нюусаар шахуу сагаалдаг байгаа гэжэ һананаб. Абамнай уняа табижа, хото хорёогоо арюудхахадаа, хүндэ мэдэгдэхэгүй гэжэ оролдогшо һэн. Тиимэ саг байгаа ха юм даа. Хара багаһаа аба эжытэеэ иигэжэ сагаалжа ябалсаһан хадаа мүнөөшье ахамадуудтаа баяр хүргэхэеэ мартадаггүйб. Гэр бүлөөрөө, үхибүүдээ дахуулаад, дүтынгөө хүнүүдые заабол золгожо ошодогбди. Тэрэнэй ашаар залуушуулнай, үри хүүгэднай танилсана, ёһо заншалаа мэдэхэ болоно, аха захаяа хүндэлжэ һурана ха юм.
