​​Һурагшадай бүхэроссиин олимпиадын можо нютагай шата эхилбэ

Январиин 11-дэ Байгалай Аяншалгын колледждо Һурагшадай Бүхэроссиин олимпиадын можо ню­тагай шатын эхилһэнэй баяр ёһолол үнгэргэгдэбэ. Уласайм­най аха ангинуудай һурагшад февралиин 25 болотор 24 пред­медээр эрхимүүдээ элирүүлхэнь гээшэ. Тэдэ заншалта ёһоороо, нэн түрүүн һургуули соогоо шал­гараад, аймагайнгаа хэмжээнэй олимпиада дабажа гарадаг гэжэ һануулая.

Уласай шатада хабаадагша­дые Буряад Уласай Болбосоро­лой болон эрдэм ухаанай яаманай һургуулиин урдахи ба юрэнхы бол­босоролой таһагай дарга Татьяна Елистратова амаршалаа.

«Үхибүүд! Һара хахадай тур­шада таанад хүндэшье һаа, һонирхолтой ажал хэхэтнай. Шал­галтын даабаринуудые дүүргэхын тула гүнзэгы мэдэсэ, зохёохы хандаса хэрэгтэй. Можо нюта­гай шатада илагшад Бүхэроссиин шатада Буряадаа түлөөлхэ. Тэн­дэ илабал, гүрэнэйнгөө дээдэ һуралсалай эрхим гуламтануудта шалгалтагүйгөөр орохо эрхэтэй болохот. Бултандатнай амжалта хүсэнэб!» - гэжэ Татьяна Сергеевна һурагшадта хандаа.

Тэрэл үдэр түрүүшын олим­пиада - француз хэлээр бэшэмэл шалгалта үнгэргэгдэһэн байна, ян­вариин 14-дэ – ород хэлээр, 15-16-да – химиин олимпиада. Һурагшад февралиин 25 болотор удаа дараалан, бүхы предмедүүдээр шалгалтануудые дабажа гараха. Һонирхолтойнь гэхэдэ, англи, немец, француз хэлэнүүдһээ гадна испан, итальян, хитад хэлэнүүдээр олимпиаданууд болодог юм байна.

Хэнэйшье мэдэһээр, Һурагшадай Бүхэроссиин олимпиада Болбосорол тухай хууляар хараа­лагданхай. Һурагшад һургуулиин, аймагай, можо нютагай шатанууд­та хаба шадалаа туршажа, эрхимэй эрхимүүдынь бүхэроссиин шатада оролсодог. Эндэ предмет бүхэнөөр 200 гаран хүн хабаададаг юм.

Нёдондо уласай хэмжээнэй ша­тада 1172 һурагша хабаадаа һэн. Мүнөө жэлдэ 1233 хүн тоологдоно. 2010-2017 онуудай хугасаада Буря­адай 12 түлөөлэгшэ Бүхэроссиин олимпиадын түгэсхэлэй шатада шангай һууринуудые эзэлһэн бай­на: физкультураар – 3, ОБЖ-гаар – 2, англи хэлээр – 2, түүхэ, тоо бо­долго ба ород хэлээр - нэгэ-нэгэ һурагша.

Һурагшад үндэһэн соёлой предмедүүдээр мүрысэнэ Тус олим­пиада баһал январиин 11-һээ эхиеэ абаад, энэл һарынгаа 28-да түгэсэхэ. Түрэл нютагайнгаа түүхэ ба соёл­до хүүгэдэй һонирхол түрүүлхын, түрэл хэлэнүүдые хамгаалхын бо­лон хүгжөөхын тула энэ хэмжээ ябуулга эмхидхэгдэнэ гээшэ.

Тиин Буряадай түүхээр олимпиада январиин 12-то үнгэргэгдөө. Эндэ 10-11-дэхи ан­гинуудай һурагшад хабаадаа. Бусад предмедүүдээр олимпиадануудые тодорхойлбол, буряад хэлэн – түрэл хэлэн, буряад хэлэн – гүрэнэй хэлэн – январиин 25-да 8-9-дэхи ангинуудай һурагшадай дунда үнгэргэгдэхэ, эвенк хэлэн – январиин 25-да (7-11-дэхи анги­нууд), буряад уран зохёол (зохёохы шэглэл), буряад уран зохёол (уран зохёол шэнжэлэлгын шэглэл) – январиин 28-да (10-11-дэхи ангинууд).