​Шэнэ хуулинууд зүбшэн хэлсэгдэхэ

Гараад байгаа 2019 он Буряад Уласай Арадай Хура­лай һунгамалнуудта ехэ харюусалгатай байхаар хүлеэгдэнэ. Юундэб гэхэдэ, гүрэнэй шэнэ үндэһэн түсэлнүүд олоор Ород Уласта бэелүүлэгдэжэ эхилхэнь ха юм.

Шэнэ жэлээ үргэнөөр тэмдэглэһэн арад зонтоёо адли һунгамалнууд ажа­лаа январиин 9-дэ эхилһэн байна. Тиигэжэ Москвада Гүрэнэй Дүүмын ээлжээтэ 6-дахи сесси ажалаа эхи­лээ. Тэрэнь июль болотор үргэлжэлхэ.

Гүрэнэй Дүүмын түрүүлэгшэ Вячеслав Володин һунгамалнуудые можо, хи­заарнуудай түлөөлэгшэдтэй нягта холбоотойгоор хүдэлхыень дурадхаба.

- Гүрэнэй үндэһэн түсэлнүүдые бэелүүлхэ та­лаар Дүүмэдэ Совет хүдэлдэг юм. Тэдэниие суглаануудаа можо нютагуудта олоор эм­хидхэхыень дурадханаб. Бу­янта хэрэгтэ дамжуулагдаһан мүнгэн яагаад гаргашалагда­наб гэжэ һайнаар шалгаха, хараха хэрэгтэй, - гэжэ Вячес­лав Володин хэлэһэн байна.

Энээнһээ боложо, Ара­дай Хуралай һунгамалнууд хамсыгаа шаман хүдэлхэ ёһотой болоно. 2019 ондо февраль, апрель, июнь, сен­тябрь, ноябрь болон де­кабрь һарануудта ээлжээтэ сессинүүд түсэблэгдэнхэй. Хажуугаарнь ээлжээтэ бэшэ сессинүүд боложошье магадгүй.

Һара бүри Арадай Хура­лай зүблэл суглаагаа зарлажа байха. Мүн тиихэдэ хороон болон намуудай фракцинуу­дай ажал үдэр бүри ябуулагдахаар хараалагданхай.

2019 оной июнь болон октябрь һарануудта уласай бюджет тухай хуули яагаад бэелүүлэгдэнэб гэжэ хоёр да­хин хэлсэгдэхэ.

Буряад Уласай ажабай­далда дайралдаһан элдэб бэрхэшээлтэ асуудалнуу­даар түхэреэн шэрээнүүд Арадай Хуралда хараалаг­данхай. Һүүлэй мэдээгээр, 11 иимэ хэмжээ ябуулга үнгэргэгдэхэ юм. Жэшээлбэл, эм домто ургамалнуудые су­глуулха тухай асуудал фев­ральда зүбшэгдэхэ. Хүдөө нютагта ажаһуугшадые эмнэлгээр хангалга тухай хөөрэлдөөн апрель соо болохоор түсэблэгдэнхэй. Энэл һарада Буряад Уласта ин­вестици оруулагшадта хай­шан гээд гүрэнэй тэдхэмжэ үзүүлэгдэнэб гэжэ хэлсэгдэхэ. Гадна гэр барилгын ажахын, нэмэлтэ һуралсалай, хүдөө ажахын болон газарай бэрхэ­шээлтэ асуудалнууд түхэреэн шэрээнүүдтэ хараалагдаха.

Эдэ бүгэдэ уулзалгануу­дай удаа арад зондо хэрэгтэй хуулинууд баталагдаха бэзэ гээд найдагдана.

Анна Огороднигой гэрэл зураг