​Шэнэ руу алхам – шэн зоригтойгоор

Засаг түрын хэблэлэй албанай ажалынь захагүй ехэ бай­даг. Сэтгүүлшэдтэй холбоо байгуулха, тэдэндээ үдэр бүри мэдээсэлнүүдые эльгээхэ гэхэ мэтэһээ эхилээд, эм­хидхэлэй ажал барашагүй. Буряадай Ниигэмые хамга­алгын яаманда эгээл иимэ үүргэ даагаад ябаһанаа, Россиин Олониитын палатада мэдээсэлгын албанда мүнөө хүдэлжэ байһан Юлия Малышевскаятай хөөрэлдөө дурадхахамнай.

- Юля, Москвада ажалла­жа эхилһээршни эгсэ жэл үнгэршэбэ. Тэндэ ажамидар­хада хэр бэ?

- Сэхыень хэлэхэдэ, Буряадһаа гадуур ажаһууха хүсэл намда хэзээдэшье байгаагүй. Наһанайм нүхэртэ Москвада ажал дурадхахадань, яаха аргагүй гэр бүлөөрөө зөөхэ баатай болообди. Рос­сиин ниислэлдэ һайн тала­нууд олон. Илангаяа хүнэй ажаһуухада зохид оршон хо­тын булан бүхэндэ үзэгдэнэ. Москвагай захын квартал ха­раад үзэхэдэ, ажаһуугшадта бүхы хэрэгтэй хангалтанууд бии: һургуули, сэсэрлиг, томо дэлгүүрнүүд... Амаралтын сэсэрлигүүд тоогүй олон – ду­раараа ябахаар. Иишэ тиишээ ошохо гэбэл, түлбэриин нэгэ гурим дурадхагдана.

- Хэр удаан шэнэ оршон байдалда дадаабши?

- Һураһан юумэ һураар татахагүй гэдэгтэл, хүн бүхэн тогтонижоһон байдалаа ху­билгаха дурагүй байдаг. Шэнэ руу алхам хэхэнь хэсүүхэн шэнги һэн. Илангаяа славян шарайгүй зондо Москвада ша­хардуу гэжэ оло дуулаһан бай­гааб.

Ерэхэтэеэ сасуу ажал бэдэржэ эхилээб. Хуби­ин хэрэгтэ, гүрэнэй ажал­да зууршалга хэжэ, хэдэн олон хөөрэлдөөнүүдые га­рааб. Гайхалтайнь гэхэдэ, нэгэмүһэн хоёр тээ ажал­да абахабди гэһэн зүбшөөл ерээ. Тиихэдэнь космическа оньһон түхеэрэлгэнүүдтэй хабаатай хубиин хэрэгтэ бэеэ туршаха гэжэ шуумайгааб. Урид үзөөгүй шэб шэнэ шэ­глэл шэнжэлжэ эхилхэдэм, һонирхолтой байгаа. Гэбэ­шье космонавт Александр Мисуркинтай танилсаһамни бүхөөр хадуугдаа. Уулзажа харилсаһанайм хойно хэдэн үдэрэй үнгэрхэдэ, тэрэ сансар руу ниидээ бшуу.

Ажалайм намтарай удаа­дахи шата Ородой Холбоото Уласай Олониитын палатада эхилээ. Тиимэһээ Россиин ни­ислэлдэ өөрөөшье мэдэнгүй дадааб. Түрэһэн нютагаа бу­саха хүсэл байгаал ааб даа. Харин һаяын сагта бэшэ. Юун­дэб гэхэдэ, үхибүүдтэ эндэ ехэ һайшаагдана.

- Алибаа ушарнууд тохё­олдодог аабза...

- Элдэб ушарнууд байгаа ааб даа. Метродо бодоод ябаһан нэгэ һалга үбгэндэ һуурияа үгыш гэһэмни, урдаһаам дураа гутан хашхарһан хүбүүн үгыем дуулажа, бодохо баатай болоо һэн.

Нэгэ эхэнэр намаар үдэшүүлээд, Ташкентһээ иишэ ерээ гүш гэжэ асуугаа бэлэй. Москвада ажаһуухаяа ехэ хүсэдэг байгаа аабзаш гэжэ бодоһоноо “буудаа” һааб даа. Тиихэдэнь урдаһаань урихана­ар миһэрээд: “Үгы”, - гэжэ гай­хуулааб.

- Хүндэ һайниие хэ­хэл гэжэ тэгүүлдэгшни һайшаалтай. Буряадай Нии­гэмые хамгаалгын яаманда хүдэлһэншни нүлөөлнэ аал­тай?

- Яаманда хүдэлхэ хаһадаал олон юумэ мэдэжэ абааб. Хэды олон зон туһаламжа хүлеэнэ гээшэб. Заримашуул орёо байдалда ороод байна. Саг зуурын энэ “агы нүхэнһөөнь” абаран гаргаха хэрэгтэй. За­римашуул хажуудаа харилсаха хүнгүй гансаардана. Социаль­на һалбарида тон энэрхы сэдь­хэлтэй, бүхэ голтой хүнүүд лэ ажаллана гэжэ ойлгооб. Бай­ха гэргүй зоной түбхинэһэн газартай танилсахаяа гү, али архинша айлай байдал хара­хаяа янза бүриин рейднүүдтэ ябахадаа, хүнүүдэй талаһаа эсэргүүсэхыень нилээн анхарааб. Нэгэтэ урдаһаамнай һүхэ баряадшье далайгаа бэлэй.

Хүнэй түлөө һанаата бо­лодог лэ зон социальна һалбарида хүдэлдэг гэжэ сайд Татьяна Быковагай хэлэһэниие тон зүб гэхэ бай­наб.

Яаманда хүдэлхэдөө, олон танилнуудтай болооб, бүхы Бу­ряадаар ябааб. Ехэл һургуули гарааб гэхэ байнаб.

- Абаһан хэшээлшни мүнөөнэйш ажалда туһа бо­лоно аабза.

- Болонгүй яахаб. Олонии­тын палата гээшэ тон эдэбхи­тэй эмхи гэхэ байнаб. Росси­ин элдэб хотонуудаар ябанаб. Коммерческэ бэшэ эмхинүүд олондо туһатай хэды ехэ ажал хэнэб даа. Галина Горбатых гээшые Буряадай ажаһуугшад һайн мэдэхэ. Харин Россиин Олониитын палатада тэрэ­эндэл адли олониитын хэрэг ябуулдаг аяар 168 хүн тоолог­доно. Тэдэнэй дунда - Диана Гурцкая, Ирина Винер-Усмано­ва болон бусад.

- Олонһоо һайниие оно­хын тулада баһал шадабари хэрэгтэй. Социальна элдэб бэрхэшээлнүүдые харадаг­шье һаа, хододоо урин нал­гай ябадаг хадашни зарим­даа гайхамаар байдаг.

- Хүн түрэхэһөө уруу дуруу байдаггүй. Өөрөөл шэлэнэбди шэнжэ шанараа.

- Сүлөө саг гэжэ шамда байдаг гү?

- Бүхы сүлөө сагаа үхибүүдтээ зорюулнаб. Ажа­лай үдэрнүүдтэ хүгшэн аба, эжыгүй хүндэхэн ааб даа. Мо­сквагай нэгэ захаһаа нүгөө заха руу үхибүүгээ кружог­то абаашахань бэрхэтэй. Гэ­бэшье тудаһан сүлөө саг­таа англи хэлэеэ мүлинэб, фитнес-клуб руу шамданаб. Гадна эрдэм шэнжэлгынгээ ажал үргэлжэлүүлнэб. Иимэл даа, мүнөөдэрэй байдални.

- Түгэсхэлдөө юу хэлэһэйб гэжэ бодоно?

- Буряадайнгаа бүхы сэтгүүлшэдые үнгэрһэн мэр­гэжэлтэ һайндэрөөр амаршал­наб, амжалта хүсэнэб!

@jennykazakovaphoto