833
Сагаан эдеэгээр амтан хоол яагаад бэлдэхэб гэжэ мэргэжэлтэд Сагаалганай үмэнэ дүршэлөөрөө хубаалдахань. Январиин 25-27-ой үдэрнүүдтэ үглөөнэй 10 сагһаа үдэрэй 15 саг хүрэтэр “Бурятия” гэжэ зочид буудалай ресторанда һуралсал гараха арга олгогдохо юм.
Дэлгүүрнүүдтэ худалдаанда байдаггүй үрмэ, ааруул, хүшөөмэг, боорсог гэхэ мэтын буряад-монгол арадай сагаан эдеэнэй дээжэ олоной дура буляадаг. Гэбэшье үеһөө үедэ дамжуулагдаһан заншалта эдеэгээ бэлдэхэ шадабарияа олонхи зон, илангаяа залуушуул алдажа эхилэнхэй. Эгээл тиимэһээ үндэһэн арадайнгаа сагаан эдеэ бэлдэхэ бүхы оньhон аргануудыень Шэнэхээнэй Балма багша болон бусад мэргэжэлтэд ехэ тодорхойгоор харуулан заажа үгэхэ. Шэрээгээ шэмэглэхэ гү, али Бурхандаа табиха найман янзын эдеэ бэлдэжэ һурахат, тиихэдээ нэгэ литр гү, али арбан литр һүөөр хэды шэнээн сагаан эдеэ буйлуулхаар бэ гэжэ ойлгожо абахат гээд, эмхидхэгшэд дуулгана.
Буйлуулһан эдеэнэй онсо илгаа яагаад олондо мэдээжэ болгохо тухай психолог Маргарита Дамбаева ойлгуулжа үгэхэ. Олондо тарааха бүхы арга боломжонуудтай Антон Кузнецов танилсуулха. Хадагалха, хүргэн дамжуулха гэхэ мэтын хэмжээнүүд тухай олзын хэрэг ябуулдаг байгуулгын жэшээ дээрэһээ мэдэжэ абахат. Һуралсал гараһанайтнай удаа үнэмшэлгэнүүд үгтэхэ юм.
