1016
Түймэрэй аюултай хаһада бэлэдхэлэй ямар ажал хэгдээб гэхэдэ, «Авиалесоохрана» эмхитэй, Алас Дурнын федеральна тойрогой ойн ажахын департаменттэй түймэр сараха талаар түсэбүүд табигдаа. Ойн түймэр унтараалгада хабаадаха хүнүүд болон хэрэглэгдэхэ техникын тоо гуримшуулагдаа. Ойн түймэр сарадаг техникэ шэнэлхэ талаар түсэб табигдаа.
Буряад Уласай Ойн ажахын агентствын хүтэлбэрилэгшэ Александр Мартыновай хэлэһээр, байгша ондо нёдондонойхидо орходоо, түймэр һэргылхэ, сараха хэрэгтэ мүнгэ һомололго 30 сая түхэригөөр дээшэлээ.
«Һомологдоһон мүнгэнэй ехэнхи хубинь түймэр һэргылгэдэ дамжуулагдаха», - гэжэ Александр Мартынов тэмдэглэбэ.
Бүхыдөө түймэрһөө ой аршалха хэрэгтэ 350 сая түхэриг һомологдохо гэжэ түсэблэгдэнхэй.
Тиихэдэ радиостанцинуудай ажал шалгагдаха. Түймэр сарагшад хоорондоо холбоо бариха радиотехникээр хангагдаха юм. 2019 ондо Буряад Уласай Загарай, Байгал шадарай, Кабанск, Тарбагатай, Ивалга, Баргажан аймагуудта түймэрэй гараһан тухай мэдээсэхэ видеомониторинг үргэлжэлүүлэгдэхэ. Тиигэжэ хахад сая гектарһаа дээшэ ойн талмай хинагдаха юм. Ойн түймэрһөө хүдөө нютагууд, һууринуудые аршалха хэрэгтэ онсо анхарал хандуулагдаха. Буряад Уласта ойдо дүтэ оршодог 156 нютагта һэргылэмжын ажал ябуулагдаха.
