1056
Буряад Уласай барилгын болон гэр байрын ажахы шэнэдхэлгын яаман Ородой Холбооото Уласай барилгын яамантай «Гэр байра болон хотын оршон» гэһэн үндэһэтэнэй түсэлөөр хэлсээ баталаа. Буряад уласта 6 жэлэй туршада тус түсэлөөр хэды шэнээн шэнэ гэрнүүд ашаглалгада тушаагдахаб, хуушарһан гэрнүүд сүлөөлэгдэхэб, оршон тойрон болбосон түхэлтэй болгогдохоб гэжэ хэлсээндэ тэмдэглэгдээ.
«Гэр байра болон хотын оршон» гэһэн үндэһэтэнэй түсэлэй хэмжээндэ «Гэр байра», «Болбосон түхэлтэй хотын оршон байгуулга» болон «Хуушарһан гэрнүүдэй тоо бага болгохо» гэһэн федеральна түсэлнүүд бэелүүлэгдэнэ. Тиихэдэ үндэһэтэнэй түсэл бэелүүлгэдэ 4 миллиардһаа дээшэ мүнгэн һомологдохо юм.
Бүхыдөө 6 жэлэй туршада олониитын 1311 газар болон мянганһаа дэээшэ гэр шадарай дэбисхэр болбосон түхэлтэй болгогдохо. Тиихэдэ оршон тойрониие болбосон түхэлтэй болгохо асуудалнуудые шиидхэлгэдэ 2024 он болотор ажаһуугшадай 30 хубинь хабаадаха ёһотой гэжэ хэлсээндэ тэмдэглэгдэнхэй.
2024 он болотор федеральна түсэлэй хэмжээндэ хуушарһан гэрнүүдһээ 3690 ажаһуугшад зөөхэ ёһотой. Зургаан жэлэй туршада энэ ажал бэелүүлгэдэ 2,94 миллиард түхэриг гаргашалгадаха.
