​​Эсэгэ ороноо хамгаалагшадай үдэртэ зорюулагдаһан хэмжээ ябуулганууд Буряад Уласта үнгэргэгдэбэ

Февралиин 23-да үдэр Улаан-Үдын Соведүүдэй талмай дээрэ Эсэгэ ороноо хамгаалагшадай һайндэр тэмдэглэгдээ. Буряадай Толгойлогшо Алексей Цыденов Эсэгэ ороноо хамгаалжа байһан сэрэгшэдые, ветерануудые, сэрэгэй алба дүүргэгшэдые амаршалба.

- Хүн бүхэн хэжэ байһан ажалдаа үнэн сэхээр хандажа, Эхэ ороноо бата бэхи хүгжэлтэдэ хубитаяа оруулжа, гансашье дайнай дүлэн соогуур бэшэ, харин амгалан сагта гүрэн түрэеэ аршалха аргатай. Арад зон эбтэй эетэй, дайн дажар гарангүй, манай гүрэн хүсэтэй, хүгжэнги байг, - гэжэ Алексей Цыденов хэлэбэ.

Буряад уласай түб талмай дээрэ «Чисто по-мужски» гэһэн һайндэр үнгэргэгдөө. Улаан-Үдын ажаһуугшад болон айлшад викторина, квестдэ хабаадажа, хэр мэргэн, хүсэтэй байһанаа шалгаба.

Тиихэдэ кавер-группа «Смак», Алина Намсараева, «Хатхур Зуу» рэп-команда, КВН наадагшадай «Берег Байкала» гэһэн бүлгэмүүд хэмжээ ябуулга шэмэглэжэ, һайндэрэй тоглолтодо хабаадаба. 

Анна Огороднигой гэрэл зураг