1081
Москва можын Красногорск хотодо «Болбосон түхэлтэй хотын оршон байгуулха эрхим түсэлнүүдэй Бүхэроссиин мүрысөөн» эхилбэ. Энэ хэмжээ ябуулгада Буряадай бага хотонууд - Гусиноозёрск, Бабушкин, Закаменск, Хяагта хабаадаха. Бүхэроссин мүрысөөн 6 жэлэй туршада бэелүүлэгдэхэ “Гэр байра болон хотын оршон” гэһэн программын хэмжээндэ үнгэргэгдэнэ гээд тэмдэглэтэй. Мүрысөөнэй илагшад май һарын һүүл багта соносхогдохо.
Ородой Холбоото Уласай 75 можо нютагай 1100-һаа дээшэ хабаадагшад Бүхэроссин мүрысөөнэй семинарта суглараа. Ородой Холбоото Уласай Барилгын сайд Владимир Якушевай хэлэһээр, гүрэнэй можо нютагуудта энэ хэмжээ ябуулга ехэ удха шанартай. Удаань 2018 ондо үнгэргэгдэһэн мүрысөөнэй дүнгүүдые сайд согсолһон байна.
- Үнгэрэгшэ жэлдэ Ород гүрэнэй 82 можо нютагһаа мүрысөөндэ хабаадаха тухай 455 мэдүүлгэ ороһон байна. 43 можо нютагай 80 түсэл эрхимлээ. Бага хотонууд болон түүхэтэ һууринуудта 3 саяһаа дээшэ зон ажаһууна. Мүнөө энэ мүрысөө хубилгаха, гурбан жэлээр уридшалан хэмжээ ябуулга үнгэргэхэ талаар ажал ябуулагдана. Можо нютагуудта эртээнһээ мүрысөөнэй эрилтэ дүүргэжэ, бүридхэлдэ абтажа, түсэлөө амжалтатай бэелүүлхэ арга олгогдохо, - гэжэ Владимир Якушев хэлэбэ.
Байгша жэлдэ үнгэргэгдэжэ байһан Бүхэроссин мүрысөөндэ илагшадые элирүүлхэ шэнэ эрилтэ табигдана. Тус түсэлнүүд бага хотонуудые түүхын, соёлой баримтануудта үндэһэлэн, болбосон түхэлтэй болгохоһоо гадуур, мүнөө сагай эрилтэдэ тааруу байха ёһотой.
Бүхыроссиин мүрысөөнэй нээлгын удаа семинарнууд эмхидхэгдээ. Эндэ үнгэрһэн жэлэй хабаадагшад дүй дүршэлөөрөө хубаалдаа. «Гусиноозёрск хотын» нютагай засагай байгууламжын даргын барилга болон гэр байрын ажахын талаар орлогшо Алдар Бальжиров Буряад уласаа түлөөлөө.
2019 оной мүрысөөнэй эрилтээр хотодо болбосон түхэлтэй болгохо талаар хаана ажал хэгдэхэб гэжэ ажаһуугшад шиидхэбэри абаха ёһотой. Тэдэнэр дурадхалнуудые оруулна. Удаань аймагай засаг зургаан мэдүүлгэнүүдые бэлдэжэ, Буряад Уласай барилгын яаманда оруулна. Буряадай Толгойлогшын хабаадалгатай комисси эдэ мэдүүлгэнүүдтэй танилсажа, федеральна засаг зургаанда оруулна.
Үнгэрһэн жэлдэ Буряад Уласай Хяагта хото Бүхэроссин мүрысөөндэ хабаадажа, түгэсхэлэй шатада ороһон байна. Мүрысөөндэ илахын түлөө арайл хэдыхэн балл дуталдаа гээд һануулнабди. Буряад Уласта 4 бага хото болон түүхэтэ нэгэ һуурин бии. Бүхыдөө эндэ 80 мянганһаа дээшэ зон ажаһууна.
Ородой Холбоото Уласай Барилгын яаманай мэдээсэлэй албанай гэрэл зураг
