​​Улаан-Үдын 32-дохи һургуули сагаалба

Эдэбхи үүсхэлтэй эжынэр - Анна Гусейнова, Людмила Кострикина, Татьяна Куртанидзе, Марина Федорова, Евгения Данханова

Үнгэрһэн долоон хоногто Улаан-Үдэ хотын 32-дохи һургуулида 6-8-дахи ангинуудай дунда “Сагаан һарын баяр” гэһэн хэмжээ ябуулга үнгэргэгдөө һэн. Харин уржадэр 5-дахи ангинууд сагаалба. Тэдэ үндэһэн буряад эдеэн табагай, үреэлнүүдэй конкурсдо хабаадаа, шагай наадаар мүрысөө болон гүйхэ, харайха урилдаанда хаба шадалаа туршаа юм.

Шагай нааданай үедэ

Зарим һургуулинуудта Сагаалган балай тэмдэглэгдэдэгшьегүй гэжэ мэдэнэбди. Иимэ ушарта буряад хэлэнэйнгээ хэшээлнүүдые болюулжархёогүйнь болоо юм гү даа гэжэ һанахаар. Харин 32-дохи һургуулида Сагаалган заншалта болонхой байхаһаа гадна буряад хэлэнэй хэшээлнүүд нэгэшье дахин таһалдажа үзөөгүй, үзэхэ-болихо тухай ехэ-ехэ шууяаншье гарадаггүй. Эндэ һургуулиин хүтэлбэриин хараа бодол яаха аргагүй гаража ерэнэ. Юундэ иитэрээ онсолнобиб гэхэдэ, тус һургуулида диилэнхидээ ород хүүгэд һурадаг юм. Жэшээнь, минии басаганай 5-дахи “б” ангида 30 гаран һурагшадай ехэдээл һаа 5-6-иинь буряадууд.

Һургуулиин Сагаалган тухай хэлэбэл, үнгэрдэгөөрөөл үнгэрөө. Нёдондо эрхим багша болоһон Гэрэлма Ванзатова болон энэ һургуулиин буряад хэлэнэй бусад багшанар заншалта ёһоороо хэмжээ ябуулгаяа зохидхоноор эмхидхээ. Харюудань хүүгэдшье, түрэлхидшье ехэ оролдожо, арга шадалаараа болоо. Зүгөөр минии һайшааһан юумэн гэхэдэ, манай ангиин хүүгэдэй түрэлхид ехэ эдэбхитэйгээр хабаадаа. Илангаяа эдеэн табагай конкурсдо ородууднай бидэнһээ, буряадуудһаа, ехээр гүйлдэжэ байгаад, бусад ангинуудайхиһаа һураггүй баян шэрээ бэлдэжэрхёо. “Сагаалганай шэрээ баян байдаг юм”, - гэлдэжэ байгаад, ехэ эбтэй эетэйгээр бууза, хуушуур, бообоһоо эхилээд, хадагтайнь, буряад угалзатай пиалануудтайнь асараа. Хэн бэ даа бүри шуһанай хиимэ шанаад ерээ һэн.

5-дахи “б” ангиин һурагшад үреэлэй һайхан үгэнүүдые хэлэжэ байна

Хүүгэднай буряад заншалта эдеэн табагууд тухай хөөрэхэдөө, иимэ ажаглалтануудые хээ: Сагаалганда сагаан эдеэн элбэг-дэлбэг байдаг, гэбэшье буряад зон мяхаша хадаа, бууза хуушуураа заабол шэрээ дээрээ табидаг; эдеэниинь нүүдэл ажабайдалдань тааруулагдаһан, хүнэй бэедэ туһатай; анхан буряадууд 40 хүрэтэрөө архи гээшые амандаашье хэдэггүй байһан...

Бүхыдөө хэмжээ ябуулгын дүнгүүдээр манай 5-дахи “б” анги 2-дохи һуури эзэлжэ, түрэлхидшье, хүүгэдшье, ангиимнай хүтэлбэрилэгшэ Татьяна Савельевнашье сэдьхэлээ хананги тараа бэлэй.

Аркадий БАТОМУНКУЕВАЙ гэрэл зурагууд