​​«Алтан Мундаргын» оройдо хүрэхын тула

“Алтан Мундарга” гэһэн һээр шаалгын наадан гурбадахияа үнгэргэгдэнэ. 2014 онһоо хойшо болоһон мүрысөөнүүдтэ иимэ олон хүн үшөө хабаадаагүй байгаа гээд тэмдэглэлтэй.

Үбэр Байгалай хизаарһаа 7 команда, Эрхүү можоһоо 8 команда, Тыва Уласһаа хоёр команда ерэжэ, мүрысөөе шэмэглээ. Буряадһаа эгээл олон түлөөлэгшэдые За­хаамин аймаг эльгээгээ - 20 командын бүридэлдэ 100 гаран хүн хадата аймагай түлөө хабаадаһан байна. Мүн тиихэдэ Аха, Ярууна, Хэжэнгэ, Хурамхаан аймагуудай айлшад найр нааданда оролсоо.

Энэ мүрысөө Интернедээр бүхы дэл­хэйн олон хүнэй хараһаниинь һайшаалтай. Юуб гэхэдэ, сэхэ дамжуулга хэгдээ. Бүхыдөө аяар 80 мянга гаран зон энэ на­ада хаража шадаа.

Мүрысөөн табан наһанай бүлэгтэ үнгэргэгдэжэ, илагшад мүнгэн шангууд­та хүртөө. Түнхэнэй Хойтогол һууринай Шагдар Халтанов, Баргажанай Хилганаһаа уг гарбалтай Руслан Сантуев, Захаами­най Олег Кутанов, Аркадий Жамбалов болон Цырен Цыренов гэгшэд өөр өөрын наһанай бүлэгтэ илалтануудые туйлажа, 20-20 мянган түхэриг мүнгэнэй шангууд­та хүртөө.

Түнхэн аймагай засаг дарга И. Альхеев илагшадые амаршалба

Командна тоосоондо Аха аймагай Бүрэн голой тамиршад түрүүлһэн байна. Владимир Дугаров, Дмитрий Самбаев, Ал­дар Будаев, Бэлигто Дамшаев ба Жаргал Налханов гэгшэд чемпионууд болоо.

16 эхэнэрнүүдэй дундаһаа Захаамин аймагай Далахай һууринай Айна Эрдыне­ева нэгэдэхи һуурида гараа.

Гол шан автомобиль абахын түлөө тэм­сээндэ һүүлшын шатада Захаамин, Түнхэн болон Баргажан аймагай түлөөлэгшэд га­ража шадаа. Эндэ гурбадахи һуурида Заха­аминай Олег Кутанов гараа.

Түнхэнэй 19 наһатай Шагдар Халтанов болон Баргажанай 24 наһатай Руслан Сан­туев хоёр үлэжэ, хэн гол шанда хүртэхэб гэжэ шанга тулалдаа харуулаа. Тэдэ гур­ба-гурбан һээр хухалаа. Удаань Шагдарай бирагүйдэхэдэнь, Руслан түрүүлээ гэжэ мэдэгдээ.

Шагдар Халтанов

Руслан Сантуев хадаа Буддын шажа­най дээдэ һургуулиин оюутан юм. Мүнөө 8-дахи жэлээ һуралсал гаража ябана. Түнхэн аймагай һээршэнэй һээр хухалхые хараад, энэ зүйлөөр һонирхожо эхилһэнээ Руслан мэдүүлээ.

Түнхэн аймагай газар дэбисхэр на­май иимэ элбэг дэлбэгээр угтаха гэжэ һанаагүйб. Эндэ ерэһээр лэ, газарай бүхы эзэдтэ мүргөөб, - гэжэ Руслан Сантуев тэм­дэглээ.Һонирхолтойнь гэхэдэ, мүнөөдэрэй илагша 2017 ондо уласай мүрысөөндэ шалгараад, һээр шаалгые орхихо гэжэ шиидэһэн аад, тиигэжэ шадаагүй бшуу.

Һээр шаалганай хүгжэлтэ, мүн эхэнэрнүүдэй тулалдаанууд тухай удаа­дахи дугаарта уншаха аргатайт.

Эмхидхэлэй хорооной гэрэл зурагууд