​​Залуу багшанар урилдаба

Альбина Будаева,  Джульетта Гаспарян

Улаан-Үдэ хотодо “Залуу багша-2019” гэһэн урилдаан бо­ложо үнгэрбэ. Тус урил­даае хотын һуралсалай ажалшадай профсоюзу­удай хороон ударидажа эмхидхээ.

Арбан нэгэн жэлэй туршада үнгэргэгдэжэ байһан энэ урилдаанда хамта дээрээ 195 эдэб­хи үүсхэл һайтай залуу багшанар, сэсэрлигүүдэй хүмүүжүүлэгшэд, нэмэл­тэ һуралсалай багшанар хабаадаһан юм. Ганса хабаадана бэшэ, харин тэмсэжэ шүүнэ, тиихэ­дээ өөрынгөө бэлиг ша­дабарияа харуулна, нэрэ хүндэеэ үргэнэ бшуу.

Энэ удаа 18 залуу­шуул мүрысэһэн байна. Урилдаан хадаа февра­лиин 7-һоо эхилээ. Тии­хэдээ 3 шатаһаа бүридөө. “Залуу мэргэжэлтэн ба мүнөөнэй һуралсалай шиидхэгдээгүй асуу­далнууд” гэһэн сэдэбэ­эр дискуссиин ёһоор түрүүшын шата үнгэрөө. Эндэ мэргэжэлтэд өөһэдынгөө һанал бодолоо мүнөөнэй һуралсалай шиидхэгдээгүй асуудалну­уд дээрэ тогтожо хөөрөө. Хоёрдохи шатада - “Нээ­мэл хэшээлдэ” хабаадаг­шад өөһэдыгөө мэргэжэл­тэ талаһаа харуулаа: заажа байһан предмедээ, мето­дикоёо хэр зэргэ мэдэнэб, мүнөөнэй шэнэ технологи хэрэглэлгэ болон энэ тэрэ бэрхэшээлтэ байдалай то­хёолдобол, яагаад энэ тэрэ юумэнһээ гарахаб гэжэ харуулжа шадаба. Харин һүүлшын “Гэртэхинтэй суглаан” гэжэ шатада ха­баадагша бүхэн өөрынгөө оюун ухаа, шадабари, хүн зонтой хэр хөөрэлдэжэ шададагаа харуулба.

Бүхы залуу мэргэ­жэлтэд эдэ шатануудые ядамаггүй дабажа гараа. Үшөө дахин “залуу наһан - гоё наһан”, эдэнэй урда бүхы харгы нээлтэтэй гээшые гэршэлээ.

Иигэжэ февралиин 22- то энэ урилдаанай дүн элирээ. Тиигэжэ Улаан- Үдын 173-дахи “Росинка” хүүгэдэй сэсэрлигэй хүмүүжүүлэгшэ Екатерина Мокрова 3-дахи шатын дипломдо, хоёрдохидо шатын дипломдо 1-дэхи һургуулиин эхин шатын багша Айсель Делова, нэ­гэдэхи шатын диплом­до 15-дахи һургуулиин англи хэлэнэй багша Альбина Ангаева, харин Гран-придэ 96-дахи “Ка­линка” хүүгэдэй сэсэрли­гэй хүмүүжүүлэгшэ Джу­льетта Гаспарян гэгшэд хүртэжэ, бэлэгүүдээр ур­машуулагдаа.

Авторай гэрэл зурагууд