927
Улаан-Үдын Советскэ хороогой нэмэлтэй һуралсалай «Форус» түбтэ Сагаан hарын найр «Арадай ёһо заншал сахин хамгаалга болон гэр бүлэ нэгэдүүлгэ» гэһэн түсэлэй хэмжээндэ үнгэргэгдэбэ. Сагаалганай найр нааданда тус эмхиин бүхы филиалнуудай түлөөлэгшэд хабаадаа.
Арадай дуунай «Номин» студиин (хүтэлбэрилэгшэнь - Сэсэг Эрдынеева) үхибүүд буряад арадай болон мүнөө үеын авторнуудай дуунуудые хангюурдажа, найр наадан эхилээ. Арадай хатарай «Сэргэ» студиин хатаршад (хүтэлбэрилэгшэнь – Ородой Холбоото Уласай габьяата артист Сергей Аюшеев) болон эстрадна дуунай «А-Студио» бүлгэмэй (хүтэлбэрилэгшэнь – Оксана Доноева) бэлиг талаантай үхибүүдые харагшад халуун альга ташалгаар угтан абаһан байна. «Номин» студиин дуулан байжа хатарһан ёохор бүришье ехээр сугларагшадые баярлуулаа.
Нэмэлтэ һуралсалай түбтэ ябадаг үхибүүдэй бэлдэһэн тоглолтын удаа гэр бүлэнүүдэй мүрысөөн эмхидхэгдээ. Эбтэй эетэй гэр бүлэнүүд «Зохёохы талаантай уг», «Сэсэн бүлэ», «Эрын гурбан наадан», «Сагаалганай хэшэг», «Бээлэй оёлго» гэһэн номинацинуудта хаба шадалаа туршаба. Гурбан хүнһөө бүридэһэн команда бүхэн мүрысөөндэ бэлдэжэ, али нэгэн номинацида бэшэнһээ эрхим байһанаа гэршэлээ. Жэшээнь, Улаан-Үдын проспект Победы, 11 гэһэн хаяагаар оршодог нэмэлтэй һуралсалай байшан түлөөлһэн Будаевтанай гэр бүлэ өөртэеэ танилсуулгаяа бусадһаа ондоогоор үнгэргэжэ, һонирхолтойгоор уг тухайгаа хөөөрэжэ, буряад арадай дуу гүйсэдхэжэ, үреэлэй һайхан үгэнүүдые хэлэһэн байна. Егниновтэнэй гэр бүлэ «Эрын гурбан нааданда» эрхимлээ. Тиихэдэ хүгшэн эжынь бэрхэ оёдолшон байһанаа «Бээлэй оёлго» гэһэн номинацида гэршэлээ. «Даллагын табаг» номинацида Будаевтанай гэр бүлэ түрүүлээ.
Мүрысөөнэй дүнгүүдээр, Улаан-Үдын Ленинэй гудамжада оршодог нэмэлтэ һуралсалай түб түлөөлһэн Егниновтэнэй гэр бүлэ нэгэдэхи һуури эзэлээ. Бэлигтэй Будаевтанай бүлэ – хоёрдохи һуурида, Чочиевтанай гэр бүлэ гурбадахи һуурида хүртэбэ.
Багшанар, түрэлхид, үхибүүд эдэбхитэйгээр хабаадажа, Сагаан hарын найр баярай оршондо үнгэргэбэ. Үнэхөөрөөшье, арадайнгаа ёһо заншалаа алдангүй, ургажа ябаа улаан бургааһадтаа дамжуулжа, гэр бүлөөрөө эбтэй эетэй ажаһуухамнай болтогой.
