​​Улаан-Үдын 29-дэхи буряад гимназида шагай наадаар шанга тулалдаан болобо

Мүнөөдэр, февралиин 28-да, Улаан-Үдын 29-дэхи буряад гимназида дүрбэдэхиеэ шагай наадаар урилдаан үнгэрбэ. Энэ урилдаанда хотын 23 һургуулинуудһаа 130 гаран үхибүүд оролсоо.

Үндэһэн буряад наадануудта һүүлэй үедэ ехэ анхарал хандуулагдажа эхилээ. Хэрбэеэ эрын гурбан наадан Сурхарбаанай үедэ эмхидхэгдэжэл байдаг һаа, һээр шаалган, шагай наадан һүүлэйл үедэ олоной хабаадалгатайгаар үнгэрдэг болоо. Тиигэжэ буряад гимназиин захирал Баир Дониров тэмдэглээд, Улаан-Үдын һуралсалай хороондо болон урилга тогтоон абаһан бүхы һургуулинуудта баяраа мэдүүлбэ.

Үхибүүд наһанай илгаагаар хубааран, шагай наадаар урилдажа эхилээ. Зарим кабинедүүдтэ шанга тулалдаан болоно гээд адаглахаар байба. Илангаяа «Шагай шүүрэлгээр» һонирхолтой урилдаан багшанарай дунда харагдаа. Нэгэ шагай дээшэнь шэдээд, шэрээ дээрэ байһан олон шагайнуудһаа аяар 7-ень альган дээрээ шүүрэн абажа шадаһан Улаан-Үдын 35-дахи һургуулиин багша Николай Гылыковые ахяад гараха хүн байбагүй. Эгээл ехэ оноотойгоор тэрэ түрүүлэн гараа бшуу.

Тиихэдэ ахамад ангиин һурагшад ехэ шуранаар шагайгаар няһалалдажа байгаа бэлэй. Гадна «Дүрбэн бэрхэ», «Мори урилдаан» гэһэн шэглэлээр тэмсээнүүд болоо. Энэ урилдаан тухай тодорхойгоор «Буряад үнэн» сониндоо хэблэхэбди, дүнгүүдыень дуулгахабди.

Авторай гэрэл зураг