​​Байгалай хойно дулаахан

Байгал ехэ далайн хойно хүйтэн гэжэ бүгэдэ һанадаг...

Хэды тиигэбэшье, алдарта Байгалай баруун хойто эрьедэхи Нижнеангарскда ажаһуудаг, хуша модоор урладаг Владимир Каурцев энэ һайхан нютагнай эльгэ дулаан нютаг юм гэжэ уран бүтээлнүүдээрээ гэршэлнэ.

Энэ уран дарханай бүтээлнүүд, нээрээшье өөрын дабташагүй дулаахан ульһатай байна гэжэ мэдэрхээр. Тэрэнэй хуша модоор хэгдэһэн уран бүтээлнүүд Улаан-Үдэ хотын музейдэ февралиин 28-най 14 сагта ”Тёплый северный Байкал” гэжэ нэрэтэйгээр үзэсхэлэн боложо нээгдээ.

- Володиимнай тусхайта өөрынь үзэсхэлэн Буряадтаа дүрбэдэхиеэ үнгэргэгдэжэ байна гэжэ баяртайгаар тэмдэглэнэб, - гэжэ мэдээжэ уран зурааша, гэрэл зураг буулгагша Юрий Извеков хэлэхэдээ, - уран нариниишни ойлгожо сэгнэхэ өөрын мэдэлшэдтэй болобош, - гэжэ амаршалаа.

Эндэ бултанда мэдээжэ Чингис Шёнхоров, Анатолий Цыденов гэгшэд амаршалхадаа, Захааминһаа тугтай Владимирнай зүнэн харгыгаа шэлэжэ, утын харгыда гарсаба гэжэ тэмдэглээ.

Владимир Каурцевэй бүхы бүтээлнүүдые шэнжэлэн бэшэжэ,“Буряад үнэндөө” хэблэхэбди.