​​Буряад Уласай Толгойлогшо Алексей Цыденов хотын залуушуултай уулзаба

Февралиин 27-до Буряадай гүрэнэй багшанарай дээдэ һургуулида Буряад Уласай Толгойлогшо Алексей Цыденов болон Засагай газарай түлөөлэгшэд, һургуулинуудай захиралнууд, аймагуудай түбүүдэй ахамад эмшэд, сбербанкын ажалшад, аймагуудай захиргаанай хүтэлбэрилэгшэд болон бусад эмхи зургаануудай хүтэлбэрилэгшэд хотын залуушуултай уулзаба.

Ородой Холбоото Уласай Юрэнхылэгшэ Владимир Путинай Федеральна суглаанда захил-хандалгын талаар залуушуулай асуудалнуудта уласай засаг зургаанай түлөөлэгшэд харюусаба. Энэ хэмжээ ябуулга хотын сурбалжалагшад эмхидхэһэн байна гээд тэмдэглэлтэй.

Тус уулзалгада ниигэмэй байдалай талаар асуудалнууд олоор ороһон байна. Тиихэдэ ажал, хүдэлмэриин талаар асуудал хүндүүлхэй гэжэ ойлгохоор. 2020 онһоо бэелүүлэгдэжэ эхилхэ “Земский учитель” гэһэн программа олоной һонирхол татаба. Багшанарай дутагдалай асуудал хүдөөдэшье, хотонуудташье үзэгдэнэ. Тиимэһээ хүдөө нютагуудта залуушуулай багшалхаа ошоходонь, гүрэнһөө нэгэ сая түхэриг түлэгдэхэ.

Тиихэдэ бэелүүлэгдэжэ байһан “Земский доктор” гэһэн программада оруулагдаһан хубилалтануудаар уулзалгада хэлэһэн байна. Тэрэнэй ёһоор, дээдэ һургуули һая дүүргэһэн залуу мэргэжэлтэдһээ гадуур, 50-һаа дээшэ наһатай эмшэд хүдөө нютаг ошожо хүдэлхэ аргатай болоо. Энэ программаар эмшэдтэ – нэгэ сая түхэриг, фельдшернүүдтэ - 500 түхэригэй тэдхэмжэ үзүүлэгдэхэ.

Хүдөө нютагуудта соёлой һалбари хүгжөөхэ зорилготой “Соёл” гэһэн түсэл бэелүүлэгдэхэ юм. Тиимэһээ 17 миллиард түхэриг хүдөөгэй соёлой байшануудай барилгада, заһабарилгада гаргашалагдаха. Россин бага хотонуудай соёлой түбүүдэй хүгжэлтэдэ 6 миллиард түхэриг һомологдохо гэжэ хэлэгдэээ.

Залуу мэргэжэлтэд, гэр бүлэнүүдые, үхибүүдые нарайлалга, эрэмдэг бэетэй үхибүүдые дэмжэхэ, тэдхэмжэ үзүүлхэ асуудалаар уулзалгада хэлсэһэн байна. Тиихэдэ эрэмдэг бэетэй үхибүүдтэ анхан 5-5 мянган түхэриг мүнгэн түлэгдэдэг һаа, харин мүнөө жэлэй июлиин 1-һээ 10 мянган түхэриг түлэгдэхэ. Пенсиин индексаци, хүнгэлэлтэтэй ипотекэ гэһэн асуудалнууд олоной һонирхол татаһан байна. 2019 оной январиин 1-һээ гурбадахи болон удаадахи үхибүүтэй болоһон гэр бүлэнүүдтэ федеральна бюджетһээ ипотекэдэ 450 мянган түхэригэй тэдхэмжэ үзүүлэгдэхэ.

Иимэ уулзалганууд жэлэй туршада үшөө нэгэтэ бэшэ боложо байхаар хараалагдана.

Авторай гэрэл зураг