1120
Аймагай захиргаанай Хүдөө ажахын таһагые ударидагша Виктор Хабитуевай хэлэһээр, ажахынуудта үбэлжөөн яһала һайнаар үнгэржэ байна. Намартаа бэлдэһэн малай тэжээлһээ хахадынь үшөө үлөөтэй зандаа. Юундэб гэхэдэ, саһа багатай үбэл тудажа, олоной үхэр мал бэлшээд, ондо ороо. Хони ямаад тобир тарган гээд адаглахаар. Һаяын сагта түл абалган захалха юм.
Тиихэдэ хүдөө ажахытай хабаатай сошордомо нэгэ мэдээсэл бии. Хориин Тулун гэжэ газарта хоёр удаа шононууд добтолго хэжэ, адуу мал хазаһан байна. Үнгэрһэн үбэл 28 ангуушадта шононуудые хюдахаар тусхай үнэмшэлгэ үгтэһэн байжа, 18 шононууд лэ усадхагдаа бшуу. Хабарай саг ерэжэ, шононууд бүри эдэбхитэйгээр добтолгоёо эхилхэ, болгоомжотой байгыт гэжэ ангуушад олониие уряална.
Автор: Сарюуна ЭРДЫНЕЕВА
