1554
Мартын 6-да Улаан-Үдэ хотын Ородой драмын театрта уласхоорондын эхэнэрнүүдэй һайндэртэ зорюулагдаһан баяр баясхаланта хэмжээ ябуулга үнгэрбэ.
Мартын 8-най һайндэртэ дашарамдуулһан хэмжээ ябуулгада Улаан-Үдэ хотын эмхи зургаануудай урагшаа һанаатай, уран шадабаритай, бэлиг талаантай эрхимэй эрхим эхэнэрнүүд суглараа. Буряад Уласай Толгойлогшо Алексей Цыденов, Улаан-Үдэ хотын захиргаанай хүтэлбэрилэгшын уялга дүүргэгшэ Игорь Шутенков, Арадай Хуралай түрүүлэгшын уялга дүүргэгшэ Баир Жамбалов гэгшэд хабарай түрүүшын һайндэрөөр эхэнэрнүүдые амаршалжа, баярай һайхан үреэл үгэнүүдээ хэлээ.
“Хүндэтэ манай эхэнэрнүүд! Бидэ бүһэтэйшүүл таанадгүй байжа шадахагүйбди, таанар бидэниие урмашуулнат, дэмжэнэт, абарнат, зүрхэ сэдьхэлээрээ дулаасуулнат, манай ажабайдалые удха бодолоор дүүргэнэт. Бидэ таанадайнгаа түлөө оролдожо юумэ бүтээжэ ябадагбди, хэһэн ажалаа таанадтаа зорюулнабди. Эрэшүүл эхэнэр хүнэй дэмжэлгээр урагшаа дабшадаг. Бүһэтэйшүүлтнай таанадаа энхэрэн ямбалжа, үри хүүгэдтнай элүүр энхэ, хододоо иимэ сэбэрхэнүүд, жаргалтайнууд ябыт даа”, -гэжэ Алексей Самбуевич дулаахан үгэнүүдээр амаршалжа, баяраа хубаалдаба.
Хэмжээ ябуулгада засаг зургаанай түлөөлэгшэд, айлшад хабаадаа.
Удаань сугларагша олон сэбэр дангина эхэнэрнүүдтэ шэхэнэй шэмэг нюдэнэй хужар болгон амаршалгын гоё һайхан тоглолто табигдаа.
Анна Огороднигой гэрэл зурагууд
Автор: Любовь ЦЫБЕНОВА
