​​Туберкулёзһоо һэргылхэ хэрэгтэй

Жэл бүхэндэ мартын 24-дэ туберкулёз үбшэнһөө һэргылэмжын үдэр тэмдэглэгдэдэг. Энэ хүндэ үбшэндэ гүрэнэй болон олониитын эмхинүүдэй анхарал татажа, эб хамта тэмсэлэй ажал ябуулха зорилго табигдадаг. Саг соогоо флюорографи гараха, үбшэнэй һүжэрөөдүйдэ элирүүлхэ, ашаг үрэтэйгөөр аргалуулха шухала гэжэ зондо ойлгуулжа, энэ муухай үбшэнһөө һэргылхын тула энэ үдэр тодоруулагданхай.

- Мүнөө сагта үбшэн нэгэ бага буураашье һаа, байдал үшөөл муу зандаа. 2018 ондо 484 хүн шэнээр үбдэһэн байна. Бүхыдөө гүрэн соомнай үбдэхэ ушарай тоо 17 хубяар дээшэлээ. Гэбэшье 2030 он болотор энэ үбшэнһөө хүн зониие гүйсэд аргалха түсэб табигданхай, - гэжэ Туберкулёзто эсэргүүсэлгын диспансерэй ахамад врач Антон Зарбуев мэдээсэбэ.