​​Хашагай аюулта хаһа эхилэнхэй

Эд хэрэглэгшэдэй эрхэнүүдые хамгаалгын ба хүнэй элүүр энхые сахилгын талаар хинадаг федеральна албан хашагай тараадаг халдабарита үбшэнһөө һэргылэмжын хэрэгтэ ажаһуугшадай анхарал хандуулна. Юуб гэбэл, Буряадта энэ үбшэн ехээр дэлгэрдэг юм. 2018 ондо хашагай энцефалидаар 35 хүн үбдэһэн байна. Энэнь гүрэн доторхи дунда зэргын тоо баримтаһаа 3 дахин ехэ.

Нёдондо уластамнай бүхыдөө 4 мянга 500 хүн хашагта хазуулаа, тэдэнэй 30 хубинь - үхибүүд. Хашагта хазуулха ушарнууд бүхы аймагуудта дайралдадаг. Зүгөөр Кабанскын, Түнхэн, Байгал шадарай, Захаамин, Баргажан аймагууд болон Улаан-Үдэ хото энэ талаар тон аюултай гэжэ тоологдоно. Жэл бүхэндэ хашагта хазуулха аюулта хаһа март һарын хуушаар захалдаг һаа, мүнөө жэл эртэ эхилэнхэй. Даб дээрээ нэгэ хүн хазуулаад байна. Ой модо руу ябадаг зондо болон үхибүүдтэ энэ үбшэнһөө һэргылэмжын тарилга заатагүй хэгдэдэг.