​​Үйлэдбэрилһэн эдеэгээ яагаад дэлгэрүүлхэб?

Иимэ гаршаг доро Буряад Уласай засагай газар болон олзын хэрэг эрхилэгшэд һая зүблөө үнгэргөө. Сугларагшад нютагайнгаа үйлэдбэрилэгшэд тухай ажаһуугшад хүсэд мэдэнэгүй гэжэ гол түлэб онсолоо. Манай эндэ бүтээгдэһэн зүйлнүүдэй үнэмшэлгэ абалга хадаа дэлгүүртэ нэбтэрүүлгын гол шата гэжэ тэмдэглэгдэбэ.

- Үнэмшэлгэтэй болохо хэрэг гаргаша ехэтэй. Тиимэһээ Үйлэдбэриин болон худалдаа наймаанай яаман мүнгэн тэдхэмжэ үзүүлхээр бэлэн, - гэжэ Буряад Уласай Хүдөө ажахын яаманай эдеэ хоолой болон үйлэдбэрилгын таһагай дарга Татьяна Полозова мэдээсээ.

Тэрэнэй хэлэһээр, шэнэ оньһото арга хэрэглэхэдэ, эдеэнэй зүйлнүүдэй янзануудые олошоруулгада, хүдөөгэй үйлэдбэриин эмхинүүдэй хамжаата ажал ябуулгада, үрдилдөөтэ эрхэ байдал һайнаар дабалгада, эдеэ хоолой зүйлнүүдые дэлгүүр наймаанда дэлгэрүүлгэдэ нүлөөлхэ.

Мүнөө Байгалай уһан, Боргойн хониной мяхан гээд өөһэдын үнэмшэлгэтэй болгохо талаар ажал ябуулагдажа байна.

Гэхэ зуура “Абсолют”, “Титан”, “Николаевский”, “Барис” гэһэн худалдаа наймаанай эмхинүүд нютагаймнай үйлэдбэрилэгшэд хэлсээтэ болзороо хойшолуулдаг, шанар муутай болон хэлсэгдэһэн хэмжээнһээ бага эдеэ хоол асардаг гэжэ мэдээсэбэ. Зүблөөнэй түгэсхэлдэ эдеэнэй зүйлнүүд заатагүй үнэмшэлгэтэй байха ёһотой гэжэ тэмдэглэгдээ.