​​Буряад робот багашуулда һайшаагдаа

Хүүгэдэй сэсэрлигтэ ябадаг үхибүүдые түрэлхи хэлэн­дэнь һургахадаа, мүнөө үеын технологинуудые хэрэглэ­хэдэ хэр ашаг үрэтэй гээшэб? Түргөөр хүгжэжэ байһан онол арганууд, сахилгаанһаа хурдан сахим хэрэгсэлнүүдээр сагтаа таарама саб-яб гэмэ шуран хур­са үхибүүдэй һонирхоһониинь гайхалгүй.

Бэлигтэй бүлын бэлэгүүд гоё

Буряад хэлэтэй хүүхэлдэйнүүд – Түмэн Дашима хоёр, арадаймнай хэлээр абяа гарадаг алфавит, мүн лэ буряадаар абаһаар дуугардаг арбагар сагаан Альфа робот, өөрөө дууладаг микрофон. Эдэ бүгэдые бэлигтэй бэрхэ бүлэ – инженер мэргэжэлтэй Саяан Забанов, наһанайнь нүхэр, буряад хэлэнэй багша, эрдэмэй дид-доктор Оюна Забанова – зохёоһон юм.

Шэнын энэ хэрэгсэлнүүдые ажалдаа хэрэглэн, шабинараа һургаха багшанаршье уластамнай олон. Эрдэмтэд, эдэбхитэй бусад­шье эгээлэй юрөөр энэ ажалаа эр­хилхэеэ болиё гэлсэһээр үнинэй.

Уласай ниислэлһээ бууһан түрүү багшанар, эрдэмтэд Түнхэн, Ахада шэнэ оньһон түхеэрэлгэнүүдые харуулаа, дүй дүршэлөөрөө хубаалдаа. Забанов­танай зохёоһон нааданхайнуудые хэрэглэжэ, түргэн ухаатай багашуулые түрэлхи хэлэндэнь һургаха тухай хөөрэлдөөн болоо. Буряадай Гүрэнэй ехэ һургуулиин буряад хэлэнэй болон тэрэниие зааха онол аргын кафедрын до­цент, багшын эрдэмэй дид-доктор Оксана Дареева нүхэдөөрөө энээн тухай сугларагшадта хөөрөө, бага­шуулай анхарал ехэтэ татаа.

Караоке дуулаад, Альфатай танилсаа

Бэлигтэй дуушан, хүгжэм зохёогшо, буряад хэлэнэй баг­ша Вера Шобосоева хоёр ай­магта һонирхолтой мастер- классуудые үнгэргөө. Хүүгэдэй сэсэрлигүүдэй үхибүүдэй болон хүмүүжүүлэгшэдэй хабаадалга­тай энэ хэшээлдэ караоке хэрэг- лэн, дуу дуулуулжа, багашуулые түрэлхи хэлэндэнь, түрэл аялга­дань дадхааха онол арга мүн лэ тааруу, ашаг үрэтэй юм байна гэһэн тобшолол багшанар хээ.

Аха аймагай түб Өөрлиг тос­хондо үдын хойно үхибүүдэй болон томошуулай олоор сугла­раад байхада, Альфатай танил­салга боложо, олониие гайхуулаа. Тэрэ буряадаар гансашье хэлэдэг бэшэ, дуушье дууладаг, хатардаг, хүл гараа хүдэлгэжэ, зүүн зүгэй наншалдаанай ааша ехэтэй аргануудыешье харуулдаг байжа, заахан хүбүүдэй һонирхол ехэтэ татаа. Рободтой наадажа байха һамбаандань үхибүүдээ түрэлхи хэлэндэнь һургаха гээшэ мүнөө сагтаа эгээл тааруу онол арга бо­лоно бэшэ гү?

(Түгэсхэлынь удаадахи дугаарта гараха)

Марина МАНШЕЕВАГАЙ гэрэл зураг