​​Арбан мэшээг һээр хуха сохигдоо

Үбэр Байгалай хизаарай спортын үндэһэн наадануудай түбэй захирал Дашинима Батоболотов Үбэр Байгалай амбан захирагша Александр Осиповто һээр харуулна

Үбэр Байгалай хизаарай “Нүүдэлшэдэй ёһо заншал” гэһэн һээр шаалгаар 2-дохи чемпионат Шэтын поли­техническэ колледжын танхим соо үнгэрөө. Мүнөө жэл Буряад Уласһаа болон Үбэр Байгалай 39 команда ха­баадаа. Үндэһэн буряадаараа хубсалһан 195 хүн һээр ша­аба.

Энэ хэмжээ ябуулгые Агын Буряадай тойрогой за­хиргаан, Үбэр Байгалай хи­заарай үндэһэн наадануудай түб, Үбэр Байгалай хизаарай буряадуудай олониитын эблэл эмхидхээ.

Үбэр Байгалай хизаарай амбан захирагшын уялгые саг зуура дүүргэгшэ Алек­сандр Осипов хабаадагшадта, айлшадта хандажа:

-Бүгэдэ арадай Сагаан һарын найрай зулай болоһон һээр шаалган болбол буря­ад арадай эртын ёһо заншал харуулһан ёһотойл арадай на­адан гээшэ, - гэжэ тэмдэглээд, бултанда амжалта хүсөө. Бу­ряад Уласай түлөөлэгшэдэй хүтэлбэрилэгшэ Долгор Ангархаева Александр Оси­повто сэнхир хадаг, дурасха­алта бэлэгүүдые барюула­ад, Үбэр Байгалай хизаарай хүгжэлтын, арад зонойнь ажана амгалан байдалай түлөө оролдожо хүдэлхыень хүсөө.

Үбэр Байгалай хизаа­рай буряадуудай олонии­тын эблэлэй түрүүлэгшэ Эрик Сангин мүнгэ санга­най дутагдал болон бэшэ­шье бэрхэшээлнүүдые дабажа ерэһэндэнь бултанда баярые хүргэхэдөө, һээр шаалган һаял үндэһэн на­адануудай мүрысөөнүүдтэ оруулагдаһандаа, үшөө хүгжэлтэнь урдаа гэжэ тэм­дэглээ.

Мүрысөөнэй ахамад шүүгшэ Батор Жапов һээр шаалгын дүримүүдтэй үшөө дахин танилсуулжа, 195 һээршэд гурбан бүлэгтэ: 20 наһа хүрэтэр эдиршүүл, 21-һээ 40 хүрэтэр залуу шэлдэгүүд, тэдэнһээ ахашуул гэжэ наһанай хэмжээгээр ху­бааржа мүрысөө.

Һээр шаагша

Удаа дараа гараһан һээршэд 4-дэхи дүхэригэй һүүлээр 59-иинь тэмсэлдэхэ­эр бэлэн байгаа. Тэдэнэй 15- иинь эдиршүүл, эгээл олони­инь –40 хүрөөгүй 41 һээршэн гээд, дүрбэн ахашуул.

Тиигэһээр эгээл бэрхэ та­бан абсолютна тэмсээндэ га­раа: Могойтын Ага-Хангилай хүбүүн, Үбэр Байгалай түмэр замай дээдэ һургуулиин ою­утан 19-тэй Мигмаржаб Да­шижигмитов, заха холын За­хааминай Хуртагаһаа ерэһэн хоритой Дандар Намдаков болон энэл наһанай Агын Амидхаашын Тимофей Вар­ганов. Эдэнэр удаа дараалан, шангай һууринуудта хүртөө. 4-дэхи һуурида гараһан Бу­лат Жалсанов (Дулдаргын Зүдхэли) болон Дулдаргын Үзөөнэй 34-тэй Баясхалан Рыгзынов.

10 часай туршада 10 мэшээг һээр хуха сохигдоо!

55 һээр хуха сохиһон Дул­дарга аймагай Зүдхэлиин “Угсаахай” команда илажа гараа. Буряадай һээршэд 51 оноотойгоор 2-дохи һуурида гараа. 37 һээр хухалһан Мо­гойто аймагай Зугаалайн “Худагта” команда 3-дахида гаража шадаа. Нэгэ оноогоор Дулдаргын “Үзөөн-2” коман­да хойнтоо. Могойтын Догойн “Домог-2” 34 һээр хуха­лаа. Эхэнэр һээршэдэй дунда 12 һээр хухалжа, Долгор Ан­гархаева түрүүлээ гэжэ тэм­дэглэе.

Буряад Уласай һээршэ эхэнэр Долгор Ангархаева

Удаадахи һээр шаалга­най мүрысөөн суута уран зохёолшо Жамсо Тумуновай гэрэлтэ дурасхаалда зорю­улагдажа, түрэһэн тоонто Дулдаргын Табтаанайда үнгэргэгдэхэ болоо.

Авторай гэрэл зураг

Тимур ЛАМБАЕВ, Шэтэ хото