685
Буряад уласай Түнхэн аймагай захиргаанда «Байгал-Хүбсэгэл» гэһэн дэбисхэртэ аяншалга хүгжөөлгэ» гэһэн эрдэмэй-практическа хуралдаан эмхидхэгдээ. Энэ хэмжээ ябуулгада Буряад Уласай аяншалгын яаманай түлөөлэгшэд, Буряад уласай, Эрхүү можын, Монголой Хүбсэгэл аймагай нютагай засагай байгууламжануудай, онсо харууһатай байгаалиин газарнуудай болон аяншалгын һалбарида олзын хэрэг эрхилэгшэдэй түлөөлэгшэд хабаадаа.
Хуралдаанда хабаадагшад хилэ шадар аяншалга хүгжөөлгын онсо шэнжэ тухай хэлсэжэ, хүүгэдэй, элүүржүүлгын болон санаар ябалгын аяншалгын һалбаринуудта холын хараата түсэлнүүдтэй танилсуулаа. Тиигэжэ Буряад уласай Түнхэн, Аха аймагуудай, Монголой Хүбсэгэл аймагай, Эрхүү можын Слюдянска аймагуудай захиргаанууд аяншалгын һалбарида суг ажал ябуулха тухай хэлсээ баталһан байна.
