1044
Үнгэрһэн амаралтын үдэрнүүдтэ Кабанск аймагай Оймур нютагта «Байкальская рыбалка – 2019» 15-дахияа үнгэргэгдэбэ. Энэ хэмжээ ябуулгада Буряад Уласай Толгойлогшо Алексей Цыденов хабадалсаа.
Ородой Холбоото Улас дотор үбэл загаһа баригшадай дунда Байгалай урилдаан шухала хэмжээ ябуулганууудай нэгэн болонхой. Жэл бүри тус хэмжээ ябуулгада мянганһаа дээшэ хабаадагшад Байгалай эрьедэ суглардаг болонохой.
Буряадай Толгойлогшо Алексей Цыденов хабаадагшадые, харагшадые, хэмжээ ябуулга эмхидхэгшэдые амаршалаа. Загаһа бариха урилдаанда Ородой Холбоото Уласай туйлалтануудай Гиннесэй номой түлөөлэгшэ урилдаанай хэмжээ сэгнэжэ, номдо оруулаа.
- Загаһа баригшадай тоогоор Ород гүрэнэй туйлалтануудай Гиннесэй номдо оробобди. Байгал далайда загаһа баригшадай урилдаан саашадаа уласхоорондын хэмжээндэ гаража, хари гүрэнүүдэй командануудые олоор хабаадуулха талаар ажал ябуулха хэрэгтэй, - гэжэ Алексей Цыденов хэлэбэ.
Байгша оной хэмжээ ябуулга эмхидхэгшэд Буряад Уласай Толгойлогшын дэргэдэхи Эсэгэнэрэй зүблэлтэй хамта анха түрүүшынхиеэ 14 хүрэтэр наһатай үхибүүдэй дунда урилдаа үнгэргөө. Энэ урилдаанда Андрей Поминов нэгэдэхи һуури эзэлжэ, хүүгэдэй квадроцикл шанда хүртөө. 2-дохи һуури эзэлһэн Тимофей Ипатьев Буряадай Толгойлогшын фэтбайк - тусхай шанда хүртөө. Никита Седунов хүрэл медальда хүртэжэ, «Леново» планшедээр шагнагдаа.
Мүрысөөнэй дүнгүүдээр, Улаан-Үдын GTA команда нэгэдэхи һуури эзэлжэ, урилдаанай гол шан - Тойота «Форчунер» унаада хүртөө. Хоёрдохи һуури эзэлһэн Эрхүү можын «Ангара команда «Ямаха» снегоходоор шагнагдаа. «Динамо» команда гурбадахи һуури эзэлжэ, «Ямаха» гэһэн уһанай онгосо шанда хүртөө.
Уласай хүтэлбэрилэгшын һанамжаар, 15-дахияа эмхидхэгдэһэн хэмжээ ябуулга урагшатай үнгэргэгдөө.
Байгша оной урилдаанда Ородой Холбоото Уласай можо нютагуудай, Казахстан, Кыргызстан, Хитад, Монгол гүрэнүүдэй команданууд, Евросоюзай суглуулагдамал команда болон холын Конго гүрэнһөө айлшад ерэһэн байна. Бүхыдөө 346 команда, 1400-гаад хабаадагшад загаһа бариха мүрысөөндэ урилдаа. Тэдэнэй 12-ниинь – гэр бүлэнүүдэй, эхэнэрнүүдэй 33 команда хабаадаа. Хэмжээ ябуулгада 134 кг загаһа баригдаһан байна.
