​​“Хошон зугаада” оролсогшод шагнагдаба

2018 оной майн 30-һаа хэблэгдэһэн хошон үгэнүүдэй урилдаанай дүн мартын 6-да элирээ бэлэй. Бүхэдэлхэйн шогуушадай һайндэртэ - апрелиин 1-дэ урилдаанда илагшадта шагналнууд барюулагдаа.

Эгээл энеэдэтэй хөөрөөнүүдые олоор эльгээжэ, түрүү һуурида гараһан Долгорма Долгоржапова ерэжэ шадаагүй. Хоёрдохи һууринуудые эзэлһэн манай үнинэй хабаадагшад Лубсан Цыренов Эдуард Будаев хоёр шангуудаа урматайгаар абаа. Гурбадахи һуурида гараһан Юндэн Данзанай Цыпилма Дубчинова хоёршье баяртай байгаа. Юундэшьеб, Басаа Валера ерээгүй.

Тиибэшье, сугларһан шогуушад эб хамта хөөрэлдэжэ, уншагшадта һайшаагдаһан энэ урилдаагаа үшөө һайнаар үнгэргэхын тулада яажа оролдохобибди гэжэ хөөрэлдөө. “Буряад үнэнэй” захирал Баир Ширапов “Үнэнэйнгөө” шогуушадые амаршалхадаа, үшөөл эдэбхитэйгээр хабаадахыень уряалаад, “шангууднайшье шангахан” байха гэжэ найдуулаа.

“Хошон үгэ” урилдаанай шэнэ түсэл удаадахи дугаартаа толилжо, хүхюу хүгтэй буряадуудаа урилдаанда хүндэтэйгөөр урихабди.