1186
Буряад Уласай Толгойлогшо Алексей Цыденовэй хүтэлбэри доро үнгэргэгдэһэн зүблөөндэ хабарай тарилгада бэлэдхэл хэр зэргэ ябуулагданаб гэжэ хүдөө ажахын болон эдеэ хоолой сайд Даба-Жалсан Чирипов хөөрэбэ.
Байгша ондо орооһото урагмалнуудай талаар гүрэнэй тэдхэмжэ хоёр дахин дээшэлүүлэгдэһэн байна. Тиихэдэ таряаландаа даадхал хэһэн ажахынуудта гүрэнэй тэдхэмжын 100 хуби түлэгдэхэ, даадхалгүй ажахынуудта – 85 хубинь түлэгдэхэ юм.
- 2019 ондо федеральна болон уласай бюджедүүдһээ һомологдохо гүрэнэй тэмхэмжын хэмжээн 101,9 сая түхэриг юм. Орооһото ургамалай талаар тэдхэмжэ хоёр дахин шахуу дээшэлүүлэгдэхэ. Энэ тэдхэмжээр ажахынуудта 52,4 сая түхэриг гү, али 52 хубинь түлэгдөөд байна. Тарилгын ажалай эхилтэр мэдүүлгэ оруулһан ажахынууд тэдхэмжэдэ хүртэхэ, - гэжэ Даба-Жалсан Чирипов дуулгаба.
Тиихэдэ 2019 ондо ногооо ургуулха һалбарида 168,5 сая түхэригэй гүрэнэй тэдхэмжэ үзүүлэгдэхэ. Хойто аймагуудта һайн шанартай хүрэнгэ худалдан абаха, паар хахалха гэһэн болон бусад ажалда мүнгэн шэглүүлэгдэхэ. Бүхыдөө хабарай тарилгын ажалнуудта улас дотор 518 сая түхэриг гаргашалагдаха юм. Хүрэнгэ худалдажа абалгада - 125,3 сая, үтэгжүүлгэдэ – 77 сая түхэриг, ногоо ургамал хамгаалха хэмжээндэ – 57 сая түхэриг, түлишэдэ – 201 сая түхэриг, заһабарилгын хэрэгсэлнүүдтэ 58 сая түхэриг һомологдохо.
Буряад уласай ажахынууд 144,4 мянган гектар талмайда таряа тариха түсэбтэй. Тиихэдэ орооһото ургамал нёдондонойхидо орходоо, ехээр таригдаха юм.
2016 оной һүүл багта Буряад Уласай Хүдөө ажахын болон эдеэ хоолой яаман Хүдөө ажахы даадхалай үндэһэтэнэй зүблэлтэй энэ һалбари хүгжөөхэ тухай хэлсээ баталһан байна гэжэ һануулнабди. 2017 оной хуурай уларилһаа боложо, ногоо, таряалан гандажа, даадхал хэһэн гурбан ажахыда 6 сая түхэриг түлэгдөө һэн. 2018 ондо уласай хүдөө ажахынууд 12,4 мянган гектар талмайда 99 сая түхэригэй даадхалай хэлсээ баталһан байна.
