989
Буряад уласай, Эрхүү, Калининградска можонуудай, Үбэр Байгалай хизаарай, Хитад, Монгол, Беларусь гүрэнүүдэй олзын хэрэг эрхилэгшэд «Звениудинская ярмарка» гэһэн үзэсхэлэндэ хабаадахаар хараалагдана. Тус хэмжээ ябуулга Буряадай ниислэл Улаан-Үдэдэ байгша оной июниин 11-12-ой үдэрнүүдтэ эмхидхэгдэхэ.
Буряад Уласай Засагай газарай Түрүүлэгшын эдэй засагай хүгжэлтын талаар орлогшо Алексей Мишенинэй хүтэлбэри доро «Звениудинская ярмарка» гэһэн үзэсхэлэндэ бэлэдхэл эхилэнхэй. Беларусиин Гомельскэ, Брестскэ можонуудтай Буряад Уласай Засагай газарай баталһан хэлсээнүүдэй ёһоор, хүршэ гүрэнэй олзын хэрэг эрхилэгшэдые хабаадуулха түсэбтэй. Хитад, Монгол гүрэнүүдтэй баһал хэлсээн баталагдаха. Буряад Уласай үйлэдбэриин болон худалдаа-наймаанай яаманда үзэсхэлэндэ бэлэдхэлэй талаар ажалай бүлэг байгуулагданхай.
- Ород гүрэн болон Сибириин купецүүдэй һайхан заншал үргэлжэлүүлэн, хүгжөөн, хари гүрэнүүдэй олзын хэрэг эрхилэгшэдые хабаадуулан, «Звениудинская ярмарка» гэһэн үзэсхэлэн эмхидхэгдэнэ. Эгээл эндэ суута «Сайн зам» гаража, Байгалай саана эгээл ехэ үзэсхэлэн дэлгэгдэдэг байгаа, - гэжэ хэмжээ ябуулга эмхидхэгшэд тэмдэглэнэ.
Улаан-Үдын Автомобилистнүүдэй проспектдэ июниин 11-12-ой үдэрнүүдтэ үзэсхэлэн дэлгэгдэхэ. Эдеэ хоол, гоёлто, хубсаһа, эд бараа, дурасхаалай бэлэгүүдые үйлэдбэрилэгшэд үзэсхэлэндэ дэлгэхэ. Хуушанай үнэтэ шухаг юумэнүүдые, зураг, номуудые ажаһуугшад худалдаха аргатай. Тиихэдэ шажан мүргэлэй хэрэгсэлнүүд дэлгэгдэжэ, наймаанда табигдаха. Уран зохёолшод, ирагуу найрагшад, уран зураашад болон үзэсхэлэнэй айлшадтай уулзалгын талмайнууд хэмжээ ябуулгада эмхидхэгдэхэ. Славян арадуудай нааданууд, түүхэтэ ёһо зарим харуулагдахаар түсэблэгдэнэ.
Анна Огороднигой гэрэл зураг
