​​Бүхэдэлхэйн мүрысөөндэ бэлэдхэл эхилээ

Буряад Уласта эхэнэрнүүдэй дунда боксоор дэлхэйн чемпионат октя­бриин 3-13-ай үдэрнүүдтэ болохоор хараалагдана. Үнгэрһэн доло­он хоногто боксоор уласхоорондын федерациин (АИБА) шалгагшад Улаан-Үдэ ерэһэн байна.

Австрали, Швейцари болон Ка­нада гүрэнүүдэй шалгагшад нэн түрүүн ФСК ошобо. Тэндэхи бүхы таһалгануудые, һорилгын залнуудые, тамиршадай хубсаһа хунараа һэлгэхэ таһалгануудые, тренажёрнуудые хүндэтэ айлшад ехэ анхаралтайгаар хараа.

Буряад Уласай бэеын тамирай бо­лон залуушуулай хэрэгүүдэй сайд Вячеслав Дамдинцуруновай хэлэһээр, мүрысөөнэй тулалдаанууд ФСК-да болохо юм.

- Тус чемпионадта бэлэдхэ­лэй үедэ ФСК-гай газаахи зосоохиие заһабарилха түсэбтэйбди. Одоошье тэндэмнай элүүр энхын таһалганууд нээгдэхэ, - гэжэ сайд хэлээ.

АИБА-гай түлөөлэгшэд тамирша­дай байха газарнуудые мүн лэ шалгажа гараа. Австралиһаа гарбалтай Джон Роуз Уэйнын мэдээсэһээр, Буряад Улас яһала һайн бэлэдхэл хэжэ эхилэнхэй.

- Мүнөөдэр олон юумэ хара­жа хөөрэлдөөбди. Ехэ ажал хэгдэн­хэй. Хэды тиигэбэшье үлэһэн зургаан һара соо иигээд лэ ажал ябуулагда­бал, мүрысөө эмхидхэгшэдтэ асуудал гарахагүй, - гэжэ Джон Роуз Уэйн тэмдэглэнэ.

Хүндэтэ айлшадые оройдоол ган­са нэгэ асуудал һанааень зобооно. Яагаад тамиршад, шүүгшэд, һоригшод Улаан-Үдэ хүрэхэб гэһэн бэрхэшээл гараадхина. Энээн тухай дэлгэрэнгы­гээр АИБА-гай гэшүүд Буряад Уласай Толгойлогшо Алексей Цыденовтэй хөөрэлдэһэн байна. Чартерна агаарай онгосонууд хэдэн рейснүүдые хэхэ гэжэ хэлсэгдээ.

Борис Балдановай гэрэл зураг